ტელეკომპანია რუსთავი 2-ის ოპერატორმა, თამაზ შავშიშვილმა, ფოთის პორტში ბორანი დატოვა და გამოსვლის შემდეგ ჟურნალისტებს მოუყვა, თუ რა გადახდა ბოლო სამი დღის განმავლობაში.

როგორც ის ჰყვება, კიევში სახლიდან აიყვანეს და 2 დღის შემდეგ, გემზე აღმოჩნდა. მან ასევე განაცხადა, რომ ერთი კვირის წინ მიიღო ჟურნალისტის აკრედიტაცია უკრაინის ინფორმაციის სამინისტროსგან, სადაც წერია, რომ უფლება აქვს, უკრაინაში იმუშაოს:

"კიევში, სახლში 11 საათზე შემოვარდნენ 15 შეიარაღებული. სახეში ჩამარტყეს იარაღი, ძირს დამაწვინეს და ფეხებით მირტყამდნენ, "სკოჩით" ამიკრეს თვალები, ჩამაგდეს საბარგულში, გაურკვეველი მიმართულებით წამიყვანეს. ორჯერ გამოცვალეს ეს მანქანა. ვიგრძენი აეროპორტის ხმა, ვერტმფრენების ხმა. მომიპარეს სახლიდან, ფაქტობრივად. მერე ვერტფრენში ამიყვანეს. ჯერ წამიკითხეს, სამი წელი ვერ შემოხვალ უკრაინაშიო. ვერტფრენში ძირს დამაწვინეს და გაურკვეველი მიმართულებით გავფრინდით. ეს მთელი დღე გრძელდებოდა. აღმოვჩნდი მერე გემზე. მეც ვერ მივხვდი, რა ხდებოდა. ჩვეულებრივად მომიპარეს. სახლში შემოვიდა სპეცრაზმი და მომიპარა".

თამაზ შავშიშვილთან ერთად უკრაინიდან ბორანით ჩამოიყვანეს კიდევ რამდენიმე ქართველი. საქართველოს საელჩო უკრაინაში აცხადებს, რომ უკრაინის უსაფრთხოების სამსახურის ცნობით, საქართველოს რვა მოქალაქე იძულებით დააბრუნეს სამშობლოში, "საქმიანობისათვის, რომელიც ეწინააღმდეგება უკრაინის ეროვნული უსაფრთხოების უზრუნველყოფის ინტერესებს".

როგორც საელჩო აცხადებს, სწორედ აღნიშნულით ხსნის უკრაინული მხარე დაბრუნებასთან დაკავშირებული ინფორმაციის ნაკლებ დეტალიზაციას.