"თურქეთიდან, რომ ამდენი ნაგავი შემოაქვთ, იქ არ არის ჩვენი ტერიტორიები დაკავებული" - ამის შესახებ განცხადება გოგი თოფაძემ ორი კომიტეტის გაერთიანებულ სხდომაზე, კახი კალაძის გამოსვლისას გააკეთა.

"ამაზე ააგეს საუბარი, რომ თურმე როგორ შეიძლება რუსეთმა ჩვენი ტერიტორიები დაიკავა და "გაზპრომთან" საუბარი არ შეიძლება, მწვანილის, ღვინის გატანა შეიძლება და თუ ასე ვუდგებით, მაშინ თურქეთიდან რომ ამდენი ნაგავი შემოაქვთ, იქ არ არის ჩვენი ტერიტორიები დაკავებული? ნებისმიერი წარმატებული პროექტი, რასაც აკეთებს ჩვენი ხელისუფლება კრიტიკის ქარცეცხლში ხდება. გაიხსენეთ რა ამბავი დაგვაყარეს სამ ხეზე, სამი ხე, რომელიც არც არავის წაუღია და მთელი ტყეები გაჩეხეს საქართველოში. რა ამბავი იყო სამ ხეზე - 2 კვირა დავკარგეთ პარლამენტში, როდესაც მილიარდობით გაიტანეს ჩვენი ტყეები",- განაცხადა გოგი თოფაძემ.

თოფაძის განცხადებას ნაციონალური მოძრაობის ერთ-ერთი ლიდერი გიგი წერეთელი გამოეხმაურა სხდომაზე და იმედი გამოთქვა, რომ ალბათ ქვეყანა აცდება ახალ გეოპოლიტიკურ შეჯახებას და კრიზისს.

"იმედია, ბატონი გოგის გამოსვლის შემდეგ, თურქეთი არ გაგვინაწყენდება და დარჩება ჩვენ სტრატეგიულ პარტნიორად", - განაცხადა გიგი წერეთელმა.