საქართველოს პრემიერ-მინისტრმა გიორგი კვირიკაშვილმა თბილისის მერის დავით ნარმანიას საქმიანობა შეაფასა და თქვა, რომ მას ბევრი პროექტით შეუძლია იამაყოს. დღეს, დავით ნარმანიამ მერად მუშაობის სამწლიანი ანგარიშის პრეზენტაცია გააკეთა.

"ზედმეტი ხმაურის გარეშე, ძალიან დიდი ოპოზიციური წნეხის ქვეშ ასრულებდა ძალიან მნიშვნელოვან სამუშაოს", - განაცხადა კვირიკაშვილმა.

პრემიერის თქმით, ნარმანია რჩება ქართული ოცნების გუნდის წევრად და მის სამომავლო საქმიანობასთან დაკავშირებით სხვადასხვა ვარიანტი განიხილება.

პრეზენტაციის შემდეგ დავით ნარმანიამ ჟურნალისტებთან განაცხადა, რომ კონსულტაციების დასრულების შემდეგ გახდება ცნობილი მისი სამომავლო საქმიანობა:

"დავისვენებ ძალიან ცოტას, რომლის შემდეგაც, რასაკვირველია, მივიღებთ საბოლოო გადაწყვეტილებას. მნიშვნელოვანია ის, რომ საზღვარგარეთ არ მივდივარ, ვრჩები ქვეყანაში".

დავით ნარმანია თბილისის მერად სამწლიანი ვადით 2014 წელს აირჩიეს. ადგილობრივი თვითმმართველობის არჩევნების შედეგად 12 ნოემბერს მას კახა კალაძე ჩაანაცვლებს.