ბიზნესმენ მამუკა წერეთლის ყოფილი ცოლის, ასევე ბიზნესმენ ელენა წერეთლისა და მისი 19 წლის შვილის, დარიას, მკვლელობაში ეჭვმიტანილი 47 წლის თეიმურაზ გ. ვორონეჟის ოლქში დააკავეს და მოსკოვში გადაიყვანეს. ამის შესახებ ცნობებს რუსული მედია ავრცელებს.

რუსეთის საგამოძიებო კომიტეტის ინფორმაციით, კაცი მოკლული ელენა წერეთლის პარტნიორი იყო. გამოძიების ცნობით, მისი გადაადგილების მარშრუტის დადგენა სათვალთვალო კამერების ჩანაწერებით მოხერხდა. დაკავებული დაკითხვაზე დანაშაულს აღიარებს და, სამართალდამცავების ინფორმაციით, ამბობს, რომ თავდაპირველად დარია მოკლა, შემდეგ კი მისი დედა.

საქმე 3 ოქტომბერს მას შემდეგ დაიწყო, რაც მოსკოვის სამხრეთ-აღმოსავლეთ ნაწილში, ჟულებინის ბულვარზე მდებარე ბინაში ადამიანის ცხედრის ფრაგმენტები აღმოაჩინეს. გამოძიების ინფორმაციით, მოკლული 53 წლის ელენა წერეთელია, რომელიც რესტორატორ მამუკა წერეთლის ყოფილი მეუღლე და ბიზნესპარტნიორი იყო. ისინი რამდენიმე წლის წინ განქორწინდნენ, თუმცა საერთო ბიზნესპროექტები შეინარჩუნეს.

გამოძიების მსვლელობისას სამართალდამცველებმა "ახალ მოსკოვში" ავტოფარეხს მიაკვლიეს, რომელსაც დაკავებული იყენებდა. იქ 19 წლის დარია წერეთლის ცხედარი იპოვეს. ორივე ადგილას, ბინასა და ავტოფარეხში, ასევე აღმოაჩინეს იარაღისა და საბრძოლო მასალის სამალავები. თეიმურაზ გ.-ს დაკავებისას და ჩხრეკისას სამართალდამცველებმა ცეცხლსასროლი იარაღი, პისტოლეტები და ყუმბარები ამოიღეს.

რუსული მედიის ცნობით, გამოძიება მკვლელობის სავარაუდო მოტივად ამ ეტაპზე რამდენიმე ვერსიას განიხილავს. სამართალდამცავებზე დაყრდნობით, ერთ-ერთ შესაძლო მიზეზად კონფლიქტი და ფინანსური პრობლემები სახელდება. თუმცა ეს ვერსია ოფიციალურად საბოლოოდ დადასტურებული არ არის.

თეიმურაზ გ.-სთან ერთად ვორონეჟის ოლქში კიდევ ერთი, 1986 წელს დაბადებული ქალი იმყოფებოდა. ისიც მოსკოვში გადაიყვანეს და მისი შესაძლო კავშირი დანაშაულთან მოწმდება. თავად თეიმურაზ გ., რუსული მედიის ცნობით, 1979 წელს საქართველოშია დაბადებული.

"კომერსანტი" წერს, რომ ის დონბასში მიმდინარე საბრძოლო მოქმედებებში მონაწილეობდა და "სპარტის" დანაყოფში მსახურობდა. მოგვიანებით ის მოსკოვში დაბრუნდა და ბიზნესით, მათ შორის ავტონაწილების წარმოებით, იყო დაკავებული. ასევე საკუთარ თავს ფიტნესის სპეციალისტად წარმოაჩენდა და პერსონალურ ვარჯიშებსა და კვების პროგრამებს სთავაზობდა კლიენტებს.

ელენა წერეთელი მოსკოვში ბიზნესსაქმიანობით იყო დაკავებული. ის სილამაზის სალონის ვაშ ობლიკ"-ის ხელმძღვანელი და უძრავი ქონების გაქირავებისა და მართვის სფეროში მოქმედი კომპანია "დანიკ"-ის თანადამფუძნებელი იყო. მისი ყოფილი მეუღლე მამუკა წერეთელიც ამ ბიზნესის თანადამფუძნებლად სახელდება. წერეთლის ოჯახთან დაკავშირებით გავრცელებული ინფორმაციის თანახმად, ელენასა და მამუკა წერეთელს საერთო 19 წლის ქალიშვილი ჰყავდათ — დარია.

ამ დროისთვის გამოძიება ორმაგი მკვლელობის საქმეზე გრძელდება. გოგიაშვილისთვის აღკვეთის ღონისძიების საკითხზე სასამართლომ უნდა იმსჯელოს. გამოძიება მისი პატიმრობაში დატოვებას მოითხოვს.