მოსკოვში ქართველი ბიზნესმენის, მამუკა წერეთლის ყოფილი მეუღლის, 53 წლის ელენა წერეთლის დანაწევრებული ცხედარი საცხოვრებელი სახლის აივანზე, პოლიეთილენის ტომრებში აღმოაჩინეს. საგამოძიებო მოქმედებების დაწყებიდან მალევე, ავტოფარეხში ბიზნესმენის 19 წლის შვილის, დარია წერეთლის ცხედარსაც მიაგნეს.

ელენა წერეთელი მოსკოვში უძრავი ქონებისა და სილამაზის სალონების ბიზნესს ფლობდა. გამოძიების ცნობით, მოკლულის და მას შემდეგ დაუკავშირდა სამართალდამცავებს, რაც ელენა წერეთელმა რამდენიმე დღის განმავლობაში სატელეფონო ზარებს არ უპასუხა. 3 ოქტომბერს სამართალდამცავებმა წერეთლის სახლის კარი იძულებით გახსნეს, სადაც აივანზე, პოლიეთილენის ტომრებში, მისი დანაწევრებული ცხედარი იპოვეს.

მსხვერპლის ვინაობის დადგენისა და მისი გარემოცვის შემოწმების შემდეგ, სამართალდამცავებმა მკვლელობაში ეჭვმიტანილის კუთვნილი ავტოფარეხი გაჩხრიკეს, სადაც მამუკა და ელენა წერეთლების 19 წლის შვილის ცხედარი აღმოაჩინეს.

ТАСС-ის ცნობით, მკვლელობაში ეჭვმიტანილი ელენა წერეთლის 47 წლის მეგობარი მამაკაცი, ბიზნესმენი თეიმურაზ გოგიაშვილია. სამართალდამცავებმა ჩატარებული ოპერატიული ღონისძიებების შედეგად გოგიაშვილი დააკავეს. დანაშაულის სავარაუდო მოტივად ფინანსური უთანხმოება სახელდება.

"მან ორივე მკვლელობა აღიარა. მან თქვა, რომ ჯერ გოგონა მოკლა ავტოფარეხში, ხოლო შემდეგ — დედამისი," — განაცხადა სააგენტოს წყარომ.

გამოძიების ინფორმაციით, სათვალთვალო კამერების ჩანაწერების თანახმად, გოგიაშვილთან ერთად იმყოფებოდა ქალიც, რომელიც ამჟამად დანაშაულის თანამზრახველობის ეჭვითაა დაკავებული.