საქართველოს მართლმადიდებელი ეკლესიის საპატრიარქოს მოსკოვის საპატრიარქოს დელეგაცია ეწვია. თავდაპირველად, ამის შესახებ ინფორმაცია საპატრიარქოს ტელევიზია" ერთსულოვნებამ გაავრცელა.

მოგვიანებით, შეხვედრის დეტალებთან დაკავშირებით სოციალურ ქსელში განცხადება გაავრცელა საქართველოს საპატრიარქოს საზოგადოებასთან ურთიერთობის სამსახურმაც. მათი ცნობით, სტუმრები უწმინდესმა და უნეტარესმა, სრულიად საქართველოს კათოლიკოს-პატრიარქმა, მცხეთა-თბილისის მთავარეპისკოპოსმა და ბიჭვინთისა და ცხუმ-აფხაზეთის მიტროპოლიტმა შიო III-მ მიიღო.

მხარეებმა "მტკივნეულ რეგიონებში" არსებულ ვითარებაზე ისაუბრეს

საქართველოს საპატრიარქოს საზოგადოებასთან ურთიერთობის სამსახური ოკუპირებულ ტერიტორიებს "მტკივნეულ რეგიონებად" მოიხსენიებს და აღნიშნავს, რომ მხარეებმა შეხვედრაზე სწორედ "მტკივნეულ რეგიონებში" არსებულ ვითარებაზე ისაუბრეს.

"მხარეებმა შეხვედრაზე ქვეყნებს შორის ურთიერთობებზე ისაუბრეს. ყურადღება გამახვილდა მტკივნეულ რეგიონებში არსებულ ვითარებასა და იმაზე, თუ რა შეიძლება გაკეთდეს, რათა გამოინახოს გზები, რომ საქართველოს მართლმადიდებელ ეკლესიას შესაძლებლობა ჰქონდეს, ადგილობრივ მრევლთან ურთიერთობა დაამყაროს", — წერია განცხადებაში.

საპატრიარქოს საზოგადოებასთან ურთიერთობის სამსახური აღნიშნავს, რომ სტუმრებმა შიო III-ს პატრიარქად აღსაყდრება მიულოცეს და მას რუსეთის პატრიარქის მილოცვა პირადად გადასცეს.

"სტუმრებმა საქართველოს ეკლესიის მეთაურს პატრიარქად აღსაყდრება მიულოცეს და რუსეთის პატრიარქის მილოცვა პირადად გადასცეს. მათ სრულიად საქართველოს კათოლიკოს-პატრიარქს მიღებისთვის მადლობა გადაუხადეს", — წერია განცხადებაში.

განცხადებაში ასევე აღნიშნულია, რომ შეხვედრის დასასრულს მხარეებმა ერთმანეთს სიმბოლური საჩუქრები გადასცეს.

მოსკოვის საპატრიარქოს დელეგაციაში იყვნენ:

• მოსკოვის საპატრიარქოს საგარეო საეკლესიო ურთიერთობათა განყოფილების თავმდჯომარე, ვოლოკოლამის მიტროპოლიტი ანტონი (სევრიუკი);
  
  
• მოსკოვისა და სრულიად რუსეთის პატრიარქის, კირილეს მრჩეველი, დეკანოზი ნიკოლოზ ბალაშოვი;
  
  
• მოსკოვის საპატრიარქოს საგარეო ურთიერთობათა განყოფილების თავმჯდომარის მოადგილე, დეკანოზი იგორ იაკიმჩუკი;
  
  
• ამავე განყოფილების თავმჯდომარის თანაშემწე, მღვდელი ნიკოლოზ ვასინი;
  
  
• მოსკოვის საპატრიარქოს წარმომადგენელი საქართველოში, ვლადიმერ ალექსანდროვი.

შეხვედრას ესწრებოდნენ:

• სრულიად საქართველოს კათოლიკოს-პატრიარქის ქორეპისკოპოსი, ახალციხისა და ტაო-კლარჯეთის მიტროპოლიტი თეოდორე (ჭუაძე);
  
  
• ზუგდიდისა და ცაიშის მიტროპოლიტი გერასიმე (შარაშენიძე);
  
  
• გორისა და ატენის მიტროპოლიტი ანდრია (გვაზავა);
  
  
• ნიკორწმინდელი ეპისკოპოსი ვახტანგი (ლიპარტელიანი);
  
  
• საქართველოს მართლმადიდებელი ეკლესიის პროტოპრესვიტერი გიორგი ზვიადაძე;
  
  
• სრულიად საქართველოს კათოლიკოს-პატრიარქის მდივანი, დეკანოზი მიქაელ ბოტკოველი;
  
  
• საპატრიარქოს საზოგადოებასთან ურთიერთობის სამსახურის ხელმძღვანელი, დეკანოზი ანდრია ჯაღმაიძე.