რუსთავის მეტალურგიული ქარხანა პირველად ქარხნის ისტორიაში საკუთარი ბრენდით უნაკერო მილებს ამერიკის შეერთებულ შტატებში გაიტანს.

ამის შესახებ კომპანიის მარკეტინგის დეპარტამენტი განცხადებას ავრცელებს, სადაც აღნიშნულია, რომ 1000 ტონამდე პირველი საცდელი პარტია 25 ნოემბერს გაიგზავნება საექსპორტო ბაზარზე.

მეტალურგიული ქარხანამ საკუთარი ბრენდით მილების საერთაშორისო ბაზარზე გასატანად მუშაობა ორი წლის წინ დაიწყო:

"ექსპორტი ჯერ ჩვენი რეგიონით დაიწყო - აზერბაიჯანსა და ყაზახეთში. ამას ევროპის ქვეყნები დაემატა: ჰოლანდია, იტალია, გერმანია, პოლონეთი, რუმინეთი, ბულგარეთი და უნგრეთი. ბოლოს კი ჯერი ამერიკის ბაზარზე მიდგა, რომელიც საერთაშორისო ბაზრებს შორის ყველაზე დიდია, ნაკლებად ფრაგმენტული და, ამავდროულად, მკაცრ ნორმებს უყენებს მწარმოებლებს".

უნაკერო მილი გამოიყენება მაგისტრალური მილსადენების მშენებლობისთვის, თხევადი და აირადი ნივთიერებების დიდ მანძილზე ტრანსპორტირებისთვის, ასევე გაზისა და ნავთობის ჭაბურღილების ექსპლოატაციის, მანქანათმშენებლობისა და ზოგადტექნიკური მიზნებისთვის.

განცხადებაში ასევე ნათქვამია, რომ მილები ყველაზე მაღალტექნოლოგიური სამრეწველო პროდუქტია, რომელიც ექსპორტზე მასიურად გასულა საქართველოდან.