ტომ ჰოლანდის თქმით, იმ ფილმებზე საუბარი, რომლებითაც თავადაც ამაყობს, გაცილებით მარტივია. თუმცა წარსულში ისეთი ნამუშევრების რეკლამირებაც მოუწია, რომელთა ნახვასაც მაყურებელს გულწრფელად ვერ ურჩევდა.

"როცა იმ ფილმზე საუბრობ, რომლითაც ამაყობ, ყველაფერი ძალიან მარტივია. როდესაც გეკითხებიან, რატომ უნდა ნახოს ხალხმა ეს ფილმი, არავის ატყუებ — მართლა ფიქრობ, რომ მისი ნახვა ღირს", — თქვა ჰოლანდმა.

მსახიობმა გაიხსენა შემთხვევებიც, როდესაც მსგავს კითხვაზე გულწრფელი პასუხის გაცემა გაუჭირდებოდა.

"ადრეც მქონია შემთხვევები, როცა მეკითხებოდნენ, თუ რატომ უნდა ენახა ხალხმა ეს ფილმი. მე კი გულში ვფიქრობდი, რომ არ უნდა ნახონ, რადგან ძალიან ცუდია", — თქვა მან.

ტომ ჰოლანდს ამ ზაფხულს კრისტოფერ ნოლანის ოდისეასა და Spider-Man: Brand New Day-ში ვიხილავთ. მსახიობის თქმით, ამჯერად პრეს-ტურით განსაკუთრებით კმაყოფილია, რადგან ორივე ნამუშევრით ამაყობს.

ფოტო: GC Images

ოდისეამ გამოსვლიდან პირველივე კვირაში მსოფლიო მასშტაბით $300 მილიონზე მეტი გამოიმუშავა. ფილმი კაცობრიობის ერთ-ერთი უძველესი ამბის ეკრანიზაციაა და ოდისევსის ათწლიანი მოგზაურობის შესახებ გვიყვება.

Spider-Man: Brand New Day კი ტომ ჰოლანდის მონაწილეობით გადაღებული მეოთხე სოლო ფილმია ადამიან-ობობაზე. დოქტორ სტრეინჯის შელოცვიდან ოთხი წლის შემდეგ მსოფლიოს პიტერ პარკერი აღარ ახსოვს. ის ნიუ-იორკს ადამიან-ობობას სახელით, საკუთარი ვინაობის გამხელის გარეშე იცავს, პარალელურად კი მისი ძალები უცნაურ და სახიფათო ცვლილებებს განიცდის. ფილმი კინოთეატრებში 31 ივლისს გამოვა.