მთავრობის მეთაური ირაკლი კობახიძე "ფორმულას" ჟურნალისტის, ვახო სანაიას დაკავებას გამოეხმაურა. მისი თქმით, "ეს ადამიანი [ვახო სანაია] ფორმალურადაც კი არ მოქმედებდა როგორც ჟურნალისტი, ის მოქმედებდა როგორც პოლიტიკური აქტივისტი და უხეშ შეურაცხყოფას აყენებდა კონკრეტულ ადამიანებს".

"პირველ რიგში ის უნდა ვთქვა, რომ ამ შემთხვევაში ეს ადამიანი [ვახო სანაია] ფორმალურადაც კი არ მოქმედებდა როგორც ჟურნალისტი, ის მოქმედებდა როგორც პოლიტიკური აქტივისტი და უხეშ შეურაცხყოფას აყენებდა კონკრეტულ ადამიანებს.

რაც შეეხება გამოხატვის თავისუფლებას, შეგიძლიათ წაიკითხოთ სახელმძღვანელოები, სადაც წერია, რომ გამოხატვის თავისუფლების ძირითადი უფლებით არ არის დაცული და მოცული ადამიანის უხეში შეურაცხყოფა. საერთოდ არ იცავს გამოხატვის თავისუფლების ძირითადი უფლება უხეშ შეურაცხყოფას. შესაბამისად, აქ ფორმალურადაც კი არასწორად მსჯელობენ კონკრეტული ადამიანები. მათ აქვთ პოლიტიკური დაკვეთა.
პოლიტიკური დაკვეთა არის ის, რომ მათ უნდა გააღვივონ საქართველოში ხელოვნურად სიძულვილი, დაპირისპირება, უნდა შექმნან ასეთი აგრესიული გარემო. რა თქმა უნდა, ჩვენ ამას უნდა დავუპირისპირდეთ, იმიტომ რომ ეს არის ჩვენთვის ეროვნული ამოცანა. ჩვენი ეროვნული ამოცანაა, რომ არავის მივცეთ გარედან ხელოვნურად საქართველოში აგრესიის და სიძულვილის გაღვივების საშუალება. აქ ფორმალურ სტატუსებს მნიშვნელობა არ აქვს, ფორმალურად ადამიანი ჰქვია ჟურნალისტი თუ რაიმე სხვა, რა თქმა უნდა, არავის არ უნდა მივცეთ ჩვენ აგრესიის და სიძულვილის გაღვივების საშუალება.

კანონის წინაშე ყველა არის თანასწორი და, რა თქმა უნდა, ამ შემთხვევაშიც სწორედ ასე თანასწორად იმოქმედა შესაბამისმა უწყებამ, შინაგან საქმეთა სამინისტროს შესაბამისმა დეპარტამენტმა. ამ დეპარტამენტის საქმიანობა არის, ზოგადად, ძალიან მნიშვნელოვანი, გამომდინარე იქიდან, რომ კიდევ ერთხელ ვამბობ, საქმე ეხება ეროვნულ ამოცანას, ეროვნული მნიშვნელობის ამოცანას. ჩვენ არავის მივცემთ გარედან სიძულვილისა და აგრესიის თავსმოხვევის საშუალებას", — განაცხადა ირაკლი კობახიძემ.

22 ივლისს სოციალურ ქსელში დაწერილი პოსტის გამო "ფორმულას" ჟურნალისტს, ვახო სანაიას 14-დღიანი პატიმრობა შეეფარდა. გადაწყვეტილება მოსამართლე ზვიად ცეკვავამ მიიღო. არც ვახო სანაია და არც მისი ადვოკატი პროცესს არ დასწრებიან.