თვითაღიარებული და რუსეთისგან ოკუპირებული აფხაზეთის ე.წ. საგარეო საქმეთა სამინისტროში მიაჩნიათ, რომ საქართველოს პრემიერ-მინისტრის, გიორგი კვირიკაშვილის განცხადება აფხაზური ენის დაცვაზე ცინიკურია. ამის შესახებ თვითაღიარებული რესპუბლიკის საგარეო უწყებამ განცხადება დღეს, 28 ოქტომბერს გაავრცელა.

"აფხაზეთისა და მისი ხალხის მიმართ საქართველოს ხელისუფლების პოლიტიკა პოპულისტური და თვალთმაქცურია", - აცხადებენ აფხაზეთის თვითაღიარებულ მთავრობაში და დასძენენ, რომ საქართველოს შეიარაღებულმა ძალებმა 1992 წელს აფხაზური ინსტიტუტი დაწვეს, რითაც აფხაზეთის ისტორიასა და კულტურაზე უნიკალური დოკუმენტები და მასალები გაანადგურეს.

"ეს ფაქტები კიდევ ერთხელ მიუთითებს იმაზე, რომ მრავალი წლის განმავლობაში საქართველოს პოლიტიკური ელიტის ყველა ძალისხმევა მიზნად ისახავდა აფხაზი ხალხის გენოციდსა და ისტორიული მეხსიერებისა და თვითმყოფადობის განადგურებას", - ამბობენ რუსეთისგან ოკუპირებულ აფხაზეთში.

მათივე თქმით, პრაქტიკა მათ უჩვენებთ, რომ საქართველო აგრძელებს აგრესიულ და მტრულ დამოკიდებულებას აფხაზეთისა და მისი ხალხის მიმართ.

27 ოქტომბერს მთავრობის სხდომაზე პრემიერმა, გიორგი კვირიკაშვილმა განაცხადა, რომ მთავრობა აფხაზური ენის დაცვისა და განვითარების სახელმწიფო პროგრამას ქმნის. მისი თქმით, აფხაზური ენის დაცვისა და განვითარების სახელმწიფო პროგრამა ნდობის აღდგენის პროცესში მნიშვნელოვანი საფუძველი იქნება.