ევროკავშირის საბჭომ რუსეთის წინააღმდეგ ახალი სანქციების პაკეტი დაამტკიცა, რომელიც უკრაინის წინააღმდეგ მიმდინარე ომის, ჰიბრიდული საქმიანობისა და საერთაშორისო სამართლის, მათ შორის ადამიანის უფლებების დარღვევების საპასუხოდ ამოქმედდება. სანქციები ჯამში 34 ფიზიკურ პირსა და 47 იურიდიულ პირს შეეხო. ამის შესახებ ინფორმაციას ევროსაბჭო ავრცელებს.

ევროკავშირის განცხადებით, ახალი ზომები დამატებით ზეწოლას მოახდენს რუსეთის სამხედრო-სამრეწველო კომპლექსზე, შეამცირებს ენერგეტიკულ შემოსავლებს "ჩრდილოვანი ფლოტის" ქსელის მიზანში ამოღებით, შეაფერხებს რუსეთის ჰიბრიდულ ოპერაციებსა და სახელმწიფო პროპაგანდის გავრცელებას.

"დღეს სანქციების კიდევ ერთი პაკეტი დავამტკიცეთ, რათა რუსეთზე ზეწოლა გავაძლიეროთ და ომის დასრულება ვაიძულოთ. ეს ზომები პირდაპირ ურტყამს რუსეთის სამხედრო-სამრეწველო კომპლექსს, მის „ჩრდილოვან ფლოტს“ და იმ ქსელებს, რომლებიც მოსკოვის ჰიბრიდულ თავდასხმებს ევროპის წინააღმდეგ უწყობენ ხელს. პარალელურად მიმდინარეობს მუშაობა უფრო ფართო, 21-ე სანქციების პაკეტზე. ყოველი ახალი ზომა რუსეთს მოქმედების სივრცეს უმცირებს. ციფრებიც ბევრის მთქმელია — დასავლურმა სანქციებმა რუსეთს უკვე დაახლოებით 1-დან 1.3 ტრილიონ ევრომდე ზარალი მიაყენა. აგურ-აგურ ვანგრევთ რუსეთის საომარი ეკონომიკის საფუძვლებს," — განაცხადა ევროკავშირის უმაღლესმა წარმომადგენელმა, კაია კალასმა.

სანქციების ფარგლებში ევროკავშირმა შეზღუდვები დაუწესა 7 ფიზიკურ და 21 იურიდიულ პირს, რომლებიც, ბრიუსელის შეფასებით, რუსეთის სამხედრო-სამრეწველო კომპლექსს უწყობენ ხელს.

სანქცირებულთა შორის არიან დრონებისა და სხვა სამხედრო დანიშნულების ტექნიკის მწარმოებელი და მომწოდებელი კომპანიები. მათ შორისაა "ლავოჩკინის კვლევისა და წარმოების ასოციაცია", რომელიც რუსეთის სახელმწიფო კორპორაცია
"როსკოსმოსმა" დააფუძნა, ასევე რუსული კომპანიები "რუსტაქტი", ASFPV და IONOS.

სანქციები შეეხო ორ ჩინურ კომპანიასაც — Shenzhen Minghuaxin-სა და Xinxiang Richful Lubricant Additive Company-ს, რომელიც ჩინეთში საპოხი დანამატების ერთ-ერთი უმსხვილესი მწარმოებელი და დისტრიბუტორია.

ევროკავშირის სანქციების სიაში მოხვდნენ ასევე ERA-ს სამხედრო ინოვაციების ტექნოპოლისი და მოწინავე კვლევების ფონდი, რომლებიც რუსეთის მთავრობამ სამხედრო დანიშნულების თანამედროვე უპილოტო სისტემების განვითარების მიზნით შექმნა.

ცალკე ბლოკი ეხება რუსეთის ე.წ. "ჩრდილოვან ფლოტს", რომლის მეშვეობითაც მოსკოვი სანქციების გვერდის ავლით ნავთობისა და ნავთობპროდუქტების ექსპორტს ახორციელებს. სანქციები დაუწესდა ორ პირსა და 24 კომპანიას, რომლებიც რუსეთთან, ლიბერიასთან, თურქეთთან, არაბთა გაერთიანებულ საამიროებთან, აზერბაიჯანსა და ჰონგ-კონგთან არიან დაკავშირებული.

ევროკავშირმა ასევე დაასანქცირა 10 პირი და ერთი ორგანიზაცია, რომლებიც, ბრიუსელის შეფასებით, ჩართულნი არიან საგარეო ინფორმაციული მანიპულირებისა და ჩარევის (FIMI) საქმიანობაში. მათ შორის არიან ანატოლი კუზიჩევი, კირილ ფედოროვი, რომან ანტონოვსკი და სახელმწიფოს მიერ კონტროლირებადი გაზეთ "კრიმსკაია გაზეტას" მთავარი რედაქტორი მარია ვოლკონსკაია.

გარდა ამისა, სანქციების სიაში მოხვდნენ რუსეთში მცხოვრები სოციალური მედიის ინფლუენსერი ალექსანდრა ჯოსტი და რუსეთის მართლმადიდებელი ეკლესიის ეპისკოპოსი გიორგი შევკუნოვი, რომელიც, ევროკავშირის შეფასებით, აქტიურად მონაწილეობს რუსული პროპაგანდისა და დეზინფორმაციის გავრცელებაში, მათ შორის ისეთი ნარატივების პოპულარიზაციაში, რომლებიც უკრაინის წინააღმდეგ რუსეთის სამხედრო აგრესიას ამართლებს.
საბჭომ ასევე დაასანქცია კულტურული ინიციატივების საპრეზიდენტო ფონდი, რომელიც რუსეთის პრეზიდენტის, ვლადიმერ პუტინის, ბრძანებულებით შეიქმნა.

ახალი სანქციები შეეხო ალექსეი ნავალნის საქმესაც.

ალექსეი ნავალნის 2024 წლის თებერვალში მოწამვლასთან დაკავშირებით, 2026 წლის 16 თებერვალს გაერთიანებული სამეფოს, შვედეთის, საფრანგეთის, გერმანიისა და ნიდერლანდების მიერ გავრცელებული ერთობლივი განცხადების საფუძველზე, ევროკავშირის საბჭომ სანქციები დაუწესა ერთ ორგანიზაციასა და 15 ფიზიკურ პირს. მათ შორის არიან რუსი მოსამართლეები, პროკურორები, სამართალდამცავი ორგანოების წარმომადგენლები, სახელმწიფო უსაფრთხოების სამსახურის (FSB) თანამშრომლები და სამედიცინო პერსონალი, რომლებიც, ევროკავშირის შეფასებით, ნავალნის დევნაში, მოწამვლასა და გარდაცვალებაში მონაწილეობდნენ.

სანქციები ასევე შეეხო კომპანია IPJSC NTK-ს, რომელიც მოსკოვის საინფორმაციო ტექნოლოგიების დეპარტამენტთან თანამშრომლობდა სახის ამოცნობის სისტემის შექმნაზე. ევროკავშირის განცხადებით, აღნიშნული სისტემა გამოიყენებოდა დამოუკიდებელი ჟურნალისტების, ოპოზიციური აქტივისტებისა და იმ მოქალაქეების მონიტორინგისა და დაკავებისთვის, რომლებიც მშვიდობიანად გამოდიოდნენ ალექსეი ნავალნის მხარდასაჭერად და რუსეთის მიერ უკრაინის წინააღმდეგ წარმოებული ომის წინააღმდეგ.

ამასთან, ევროკავშირის საბჭომ კიდევ ერთი წლით, 2027 წლის 23 ივნისამდე, გაახანგრძლივა ყირიმისა და სევასტოპოლის უკანონო ანექსიის საპასუხოდ დაწესებული სანქციები.

ევროკავშირმა განცხადებაში კიდევ ერთხელ აღნიშნა, რომ არ აღიარებს რუსეთის მიერ ყირიმისა და სევასტოპოლის ანექსიას და მას საერთაშორისო სამართლის დარღვევად მიიჩნევს. მათი თქმით, უკრაინის დამოუკიდებლობის, სუვერენიტეტისა და ტერიტორიული მთლიანობის მხარდაჭერა უცვლელი რჩება და რუსეთს კვლავ მოუწოდებენ დაუყოვნებლივ ცეცხლის შეწყვეტაზე.