"რუსეთმა დაიწყო ეს ომი. რატომ არ უნდა გამოვიყენოთ რუსული ფული?" — უკრაინის პრეზიდენტმა, ვოლოდიმირ ზელენსკიმ განაცხადა, რომ ბრიტანეთის პრემიერმინისტრ კირ სტარმერთან განიხილა რუსი ოლიგარქის, რომან აბრამოვიჩის მიერ საფეხბურთო კლუბ "ჩელსის" გაყიდვიდან მიღებული 2.4 მილიარდი ფუნტის საკითხი. მისი თქმით, აღნიშნული თანხა უკრაინის საჰაერო თავდაცვის გასაძლიერებლად შეიძლება იქნას გამოყენებული. ამის შესახებ ინფორმაციას Ukrainska Pravda ავრცელებს.

როგორც ზელენსკიმ გამოცემა The Guardian-თან ინტერვიუში განაცხადა, ბრიტანეთის მთავრობა თანხის უკრაინის ჰუმანიტარული საჭიროებებისთვის გამოყოფას გეგმავს, თუმცა უკრაინული მხარე მიიჩნევს, რომ ეს რესურსი საჰაერო თავდაცვის სისტემების შესაძენადაც შეიძლება დაიხარჯოს.

"პრემიერმინისტრმა მითხრა, რომ ყველაფერს აკეთებს, რაც შეუძლია. ვიცი, რომ ჩვენი დიპლომატიური გუნდები ამ საკითხზე მუშაობენ და, რა თქმა უნდა, ეს რთული მომენტია", — განაცხადა ზელენსკიმ.

უკრაინის პრეზიდენტის თქმით, აღნიშნული თანხა დაეხმარებოდა ქვეყანას შეერთებული შტატებისგან დამატებითი საჰაერო და სარაკეტო თავდაცვის სისტემების შეძენაში.

"ეს სისტემები ძალიან ძვირია და, რა თქმა უნდა, ეს თანხა დაგვეხმარება. ჩვენს შორის ეს სამართლიანიცაა. ასე რომ, რუსეთმა დაიწყო ეს ომი. რატომ არ უნდა გამოვიყენოთ რუსული ფული?" — აღნიშნა მან.

ზელენსკიმ ასევე იხუმრა, რომ აბრამოვიჩს თანხა კიევში მათი ბოლო შეხვედრისას თან არ ჰქონდა.

"მას ეს ფული არ ჩამოუტანია. მე ვუთხარი: ჩვენ თქვენი ფული გვჭირდება", — განაცხადა უკრაინის პრეზიდენტმა.

ზელენსკის თქმით, უკრაინა პარტნიორებისგან დამატებით დახმარებას ითხოვს ქვეყნის საჰაერო სივრცის დასაცავად და ასევე ფინანსურ მხარდაჭერას სამხედროების პროფესიულ კონტრაქტებზე გადასაყვანად, რათა გაწვევაზე დამოკიდებულება შემცირდეს.

ამასთან, უკრაინის პრეზიდენტმა ხაზი გაუსვა რუსეთის წინააღმდეგ სანქციების გაძლიერების აუცილებლობას. მისი შეფასებით, მოსკოვზე დამატებითი ზეწოლა საჭიროა იმისთვის, რომ რუსეთის პრეზიდენტი სამხედრო ესკალაციის გაგრძელებისგან შეაკავონ.

ცნობისთვის, ზელენსკიმ ასევე განაცხადა, რომ ცოტა ხნის წინ რომან აბრამოვიჩს შეხვდა და მისი მეშვეობით რუსეთის ლიდერს შეხვედრის გამართვის მზადყოფნის შესახებ შეტყობინებაც გადასცა. უკრაინის პრეზიდენტმა 4 ივნისს ღია წერილით პუტინს ომის დასრულების მიზნით პირისპირ შეხვედრის თარიღის შეთანხმებისკენ მოუწოდა, თუმცა 5 ივნისს პუტინმა განაცხადა, რომ ასეთი შეხვედრის გამართვაში აზრს ვერ ხედავს.