"საარჩევნო კამპანია და ხმის მიცემა ჩატარდა უპრეცედენტო ჩარევის, ზეწოლისა და რუსეთის მხრიდან მუდმივი ჰიბრიდული თავდასხმების პირობებში, მათ შორის ეკონომიკური იძულების ზომებით, რომლებიც მიზნად ისახავდა დემოკრატიული პროცესის შეფერხებას და პოლარიზაციის წაქეზებას" — წერია წერილში, რომელსაც ევროკავშირის უმაღლესი წარმომადგენელი, კაია კალასი სომხეთში ჩატარებული საპარლამენტო არჩევნების შედეგებთან დაკავშირებით ევროკავშირის სახელით ავრცელებს.

ევროკავშირის შეფასებით, კენჭისყრამ სომხეთის დემოკრატიის, რეგიონული მშვიდობისა და ევროპასთან დაახლოებისადმი ერთგულება დაადასტურა.

განცხადებაში აღნიშნულია, რომ ეუთო/ოდირის სადამკვირვებლო მისიის წინასწარი დასკვნის თანახმად, მიუხედავად მკვეთრად პოლარიზებული საარჩევნო კამპანიისა, არჩევნები სათანადოდ ორგანიზებულ გარემოში ჩატარდა, ხოლო ამომრჩევლებს რეალური პოლიტიკური არჩევანი ჰქონდათ.

ევროკავშირი განსაკუთრებულ ყურადღებას ამახვილებს რუსეთის მხრიდან ჩარევაზე და აცხადებს, რომ საარჩევნო პროცესი უპრეცედენტო ზეწოლისა და ჰიბრიდული თავდასხმების ფონზე წარიმართა.

"საარჩევნო კამპანია და კენჭისყრა მიმდინარეობდა რუსეთის მხრიდან უპრეცედენტო ჩარევის, ზეწოლისა და მუდმივი ჰიბრიდული თავდასხმების პირობებში, მათ შორის ეკონომიკური იძულების მექანიზმების გამოყენებით ჩატარდა, რაც მიზნად ისახავდა დემოკრატიული პროცესის შესუსტებასა და პოლარიზაციის გაღრმავებას," — ნათქვამია განცხადებაში.

ორგანიზაციის შეფასებით, მიუხედავად აღნიშნული გამოწვევებისა, არჩევნებმა სომხეთის დემოკრატიული მდგრადობა და რეფორმების გზაზე მიღწეული პროგრესი წარმოაჩინა. ამასთან, ბრიუსელის განცხადებით, კენჭისყრამ კიდევ ერთხელ აჩვენა სომეხი ხალხის ერთგულება ევროპული ღირებულებების, მშვიდობიანი პოლიტიკური პროცესებისა და სტაბილური მომავლისადმი.

"მოვუწოდებთ ყველა პოლიტიკურ აქტორს, პატივი სცენ კენჭისყრის შედეგებს, დემოკრატიულ პროცედურებს და ნებისმიერი საჩივრის შემთხვევაში გამოიყენონ კანონით გათვალისწინებული მექანიზმები," — აღნიშნულია განცხადებაში.

ბრიუსელი აცხადებს, რომ სომხეთის მხარდაჭერას მომავალშიც გააგრძელებს და ახალ მთავრობასთან და პარლამენტთან თანამშრომლობით ხელს შეუწყობს დემოკრატიულ რეფორმებს, ეკონომიკურ განვითარებას, რეგიონულ მშვიდობასა და ქვეყნის სუვერენიტეტის გაძლიერებას.

ცნობისთვის, სომხეთში საპარლამენტო არჩევნები ჩატარდა, რომელიც კვირას, 7 ივნისს გაიმართა. არჩევნებში სომხეთის პრემიერმინისტრის, ნიკოლ ფაშინიანის მმართველმა პარტიამ, სამოქალაქო კონტრაქტმა გაიმარჯვა.