ინიციატივა "ჯერ საქართველოს" ერთ-ერთი დამფუძნებელი ნიკოლოზ ხატიაშვილი ამერიკელი კონგრეზმენის, ჯო უილსონის კითხვაზე აშშ-ის სახელმწიფო მდივნის მარკო რუბიოს პასუხს გამოეხმაურა. ხატიაშვილმა სოციალურ ქსელში დაწერა, რომ სახელმწიფო მდივნის პოზიციამ ნათლად აჩვენა, რომ ვაშინგტონში საქართველოსთან მიმართებით მიდგომები არ შეცვლილა და არსებული პრობლემები ახალი ადმინისტრაციისთვისაც შეშფოთების საგანია.

ხატიაშვილი აღნიშნავს, რომ აშშ-საქართველოს ურთიერთობების აღდგენა მთლიანად მმართველი გუნდის ნაბიჯებზეა დამოკიდებული, რადგან არსებობს კონკრეტული წინაპირობები (დათქმები), რომლებიც ქვეყანამ უნდა შეასრულოს. ის ასევე მიიჩნევს, რომ შექმნილ ვითარებაში, მმართველი პარტიის გარდა, სერიოზული პასუხისმგებლობა ეკისრება ოპოზიციასაც საკუთარ მომავალ ნაბიჯებთან დაკავშირებით.

"ჯო უილსონის კითხვაზე, რომელიც ეხებოდა საქართველოში მიმდინარე პროცესებს, მათ შორის საქართველოსა და ირან-ჩინეთის კავშირებს და 2024 წლის არჩევნების საკითხს, რუბიო თავისი პასუხით დაეთანხმა ამ პათოსს და ხაზგასმით აღნიშნა, რომ ამჟამინდელი ადმინისტრაცია ინფორმირებული და შეშფოთებული იყო ამ მოვლენების შესახებ. ამ განცხადებით დაიმსხვრა არსებული ნარატივი, თითქოს მხოლოდ ბაიდენის ადმინისტრაცია აღიქვამდა მძიმედ საქართველოში არსებულ ვითარებას.

რუბიომ დაადასტურა, რომ ბურთი ახლა ქართული ოცნების მოედანზეა და არსებობს კონკრეტული დათქმები, რომელთა შესრულება განაპირობებს აშშ-საქართველოს ურთიერთობების აღდგენას.

რაც შეეხება დათქმებს, სავარაუდოდ ეს არ იქნება მხოლოდ საქართველოს შიდა პოლიტიკა. დიდი ალბათობით დათქმები მოიცავს გეოპოლიტიკურ არჩევანთან დაკავშირებულ საკითხებსაც, რაზეც ჩვენს გუნდს ბოლო თვეების განმავლობაში არაერთხელ უსაუბრია.

ვფიქრობ, რომ ამ პროცესში ქართული ოცნების გარდა, ოპოზიციასაც მნიშვნელოვანი პასუხისმგებლობა ექნება თავის მომავალ ნაბიჯებთან დაკავშირებით", — დაწერა ხატიაშვილმა.

შეგახსენებთ,ამერიკელი კონგრესმენის, ჯო უილსონის მიერ საქართველოზე დასმული კითხვის საპასუხოდ აშშ-ს სახელმწიფო მდივანმა მარკო რუბიომ განაცხადა, რომ ქართულ მხარეს "მკაფიოდ განუმარტეს, რა არის საჭირო ამერიკის შეერთებულ შტატებთან ურთიერთობების გასაუმჯობესებლად და იმედოვნებენ, რომ შეძლებენ საქართველოში არსებული მოვლენების განვითარების ტრაექტორიის შეცვლას.