Freedom House-მა საქართველოს მე-5 პრეზიდენტს, სალომე ზურაბიშვილს მარკ პალმერის სახელობის პრემია გადასცა. ორგანიზაციის მიერ გავრცელებულ ინფორმაციაში ვკითხულობთ, რომ პატივს მიაგებენ საქართველოს მეხუთე პრეზიდენტს "მისი პრინციპული ლიდერობისა და ერთგულებისთვის საქართველოს დემოკრატიული და ევროპული მომავლისთვის".

"მარკ პალმერის პრიზი აღიარებს განსაკუთრებულ მიღწევებს დიპლომატებისა და მთავრობის მოხელეების მიერ დემოკრატიის დასაცავად და წინსვლისთვის. წელს, Freedom House ამაყობს, რომ პატივს მიაგებს საქართველოს მეხუთე პრეზიდენტს, სალომე ზურაბიშვილს მისი პრინციპული ლიდერობისა და ერთგულებისთვის საქართველოს დემოკრატიული და ევროპული მომავლისთვის", — წერს Freedom House.

მათივე ვებგვერდზე განთავსებულია ინფორმაცია საქართველოს მე-5 პრეზიდენტის შესახებ, სადაც ვკითხულობთ, რომ "საქართველოს ევროატლანტიკურ სივრცეში გაწევრიანების მტკიცე დამცველი, სალომე ზურაბიშვილი ფართოდ განიხილება, როგორც პროევროპელი ლიდერი, რომელიც წარმოადგენს ქართველი ხალხის ნებას".

"სალომე ზურაბიშვილი საქართველოს პრეზიდენტად 2018 წლის დეკემბერში აირჩიეს და ქვეყნის პირველი ქალი სახელმწიფოს მეთაური გახდა. ის პარიზში, ქართველი პოლიტიკური ემიგრანტების ოჯახში დაიბადა, საფრანგეთის დიპლომატიურ სამსახურში 1970-იან წლებში შევიდა და მაღალი თანამდებობები ეკავა პარიზში, ნიუ-იორკში, რომში, ვაშინგტონში, ნჯამენასა და ბრიუსელში. 2004 წელს, საფრანგეთისა და საქართველოს პრეზიდენტების ერთობლივი გადაწყვეტილებით, საქართველოს საგარეო საქმეთა მინისტრად დანიშვნამდე, 2003–2004 წლებში იყო საფრანგეთის ელჩი საქართველოში.

საგარეო საქმეთა მინისტრის რანგში მან წინ წასწია საქართველოს პროდასავლური საგარეო პოლიტიკა, ხელი მოაწერა NATO-ს ძირითად შეთანხმებებს და მოლაპარაკებები ჩაატარა ევროკავშირ-საქართველოს სამოქმედო გეგმაზე. 2005 წელს მან წარმატებით შუამდგომლობდა რუსეთის ძალების გაყვანას საქართველოს ოკუპირებული ტერიტორიებიდან.

2006 წელს მან დააარსა და 2010 წლამდე ხელმძღვანელობდა პოლიტიკურ პარტიას საქართველოს გზა. 2010 წლიდან 2015 წლამდე ხელმძღვანელობდა გაეროს უშიშროების საბჭოს ირანის მიმართ სანქციების მონიტორინგის ჯგუფს. 2016 წელს პარლამენტის დამოუკიდებელ წევრად აირჩიეს, 2018 წელს კი საქართველოს პრეზიდენტი გახდა, რითაც კიდევ ერთხელ დაადასტურა ევროკავშირსა და NATO-ში ინტეგრაციისადმი ერთგულება.

მან შექმნა "პეტრას დეკლარაცია", რათა კოორდინირებულიყო საქართველოს, უკრაინისა და მოლდოვას ევროპული ინტეგრაციის ძალისხმევა. 2024 წელს, საქართველოს დემოკრატიული უკუქცევის საპასუხოდ, მან წარადგინა "ქართული ქარტია", რათა გაეერთიანებინა პროდასავლური ძალები და წინ წაეწია ქვეყნის ევროკავშირის დღის წესრიგი. საქართველოს ევროატლანტიკურ სივრცეში გაწევრიანების მტკიცე დამცველი, სალომე ზურაბიშვილი ფართოდ განიხილება, როგორც პროევროპელი ლიდერი, რომელიც წარმოადგენს ქართველი ხალხის ნებას", — წერია Freedom House-ის ვებგვერდზე.