საზოგადოებრივი მაუწყებლის აჭარის ტელევიზიისა და რადიოს მედიაწარმოებისა და საინფორმაციო სამსახურის 14 თანამშრომელი სამსახურიდან გაათავისუფლეს. აღნიშნული ინფორმაცია "მედიაჩეკერს" არხის დირექტორმა, ირაკლი კიკვაძემ დაუდასტურა.

როგორც "მედიაჩეკერი" აღნიშნავს, კიკვაძე დილით სატელეფონო ზარებს არ პასუხობდა, თუმცა მოგვიანებით გამოცემას წერილობითი კომენტარი მიაწოდა. მისი განმარტებით, ინფრასტრუქტურული და სხვა მიზეზების გამო, ბევრი გადაცემის გაუქმება მოუწიათ და პროცესი ყველა სამართლებრივი პროცედურის დაცვით მიმდინარეობს. მისივე თქმით, ადამიანებს საეთერო დროის გამოყენების მიეცემათ საშუალება, როცა ამის პირობები იქნება.

"მოგესალმებით, მაპატიეთ, რომ ვერ გპასუხობთ. მაუწყებელში რეორგანიზაცია იყო დაგეგმილი და დაანონსებული, ჩვენმა გუნდმა მოსვლისთანავე დაიწყო ტელევიზიისა და რადიოს შიგნით არსებული გამოწვევების შესწავლა. პროცესი მიმდინარეობს ყველა სამართლებრივი პროცედურის დაცვით. გვაქვს კიდევ არაერთი გამოწვევა და ამ გამოწვევებთან გამკლავების გეგმებიც. სამწუხაროდ, ამ ეტაპზე მოგვიწია რამდენიმე თანამშრომელთან დამშვიდობება.

ამ ეტაპზე ინფრასტრუქტურული და არამხოლოდ მიზეზების გამო, ბევრი გადაცემის გაუქმება მოგვიწია. ამ მიმართულებითაც გვაქვს სამომავლო გეგმები და ადამიანებს მიეცემათ საშუალება საეთერო დროის გამოყენების, როცა ამის პირობები იქნება", — აღნიშნულია კიკვაძის პასუხში.

შეგახსენებთ, დღეს ცნობილი გახდა, რომ "აჭარის ტელევიზიიდან" 5 თანამშრომელი — ირინა ყურუა, მაია მერკვილაძე, თეონა ხარაბაძე, ლევან ურიდია და სალომე გეგეშიძე გაათავისუფლეს. მოგვიანებით, სამსახურიდან გათავისუფლების შესახებ წერილი მიიღო აჭარის საზოგადოებრივი მაუწყებლის კიდევ ერთმა თანამშრომელმა, გაბრიელა კვაჭანტირაძემაც.