რუსეთი სომხეთიდან კურკოვანი ხილისა და ყურძნის იმპორტზე დროებით შეზღუდვებს აწესებს. შესაბამისი გადაწყვეტილება რუსეთის ფედერალური ვეტერინარული და ფიტოსანიტარიული ზედამხედველობის სამსახურმა მიიღო.

უწყების განცხადებით, ბოლო პერიოდში სომხეთიდან რუსეთში ხილის მიწოდებისას დარღვევების შემთხვევებმა იმატა, რის გამოც 3 ივნისიდან დროებითი შეზღუდვები ამოქმედდება.

როსელხოზნადზორის განმარტებით, აკრძალვა შეეხება სომხეთიდან რუსეთში ალუბლის, გარგრის, ქლიავის, ატმის, ნექტარინისა და ახალი ყურძნის იმპორტს. გარდა ამისა, შეჩერდება აღნიშნული პროდუქციის ტრანზიტიც ევრაზიული ეკონომიკური კავშირის სხვა წევრ ქვეყნებში.

რუსული მხარის ინფორმაციით, შეზღუდვები ძალაში დარჩება მანამ, სანამ არ შემუშავდება შესაბამისი მექანიზმი, რომელიც უზრუნველყოფს მიწოდებული პროდუქციის უსაფრთხოების სტანდარტების დაცვას.

როსელხოზნადზორში აცხადებენ, რომ გადაწყვეტილება მიღებულია ფიტოსანიტარიული უსაფრთხოების უზრუნველყოფის მიზნით და მისი გაუქმება დამოკიდებული იქნება სომხურ მხარესთან თანამშრომლობისა და კონტროლის დამატებითი ღონისძიებების შედეგებზე.