მრავალფუნქციურმა ფსიქოლოგიურმა ცენტრმა "სინაფსმა" განაცხადა, რომ დიუშენის სინდრომი მქონე ყველა ბავშვსა და მათი ოჯახის წევრებს უფასო ფსიქოკონსულტაციასა და კრიზისული ფსიქოთერაპიის სეანსებს შესთავაზებს. ამის შესახებ ინფორმაციას "პუბლიკა" ავრცელებს.

ცენტრის მიერ გავრცელებული ინფორმაციით, საჭიროების შემთხვევაში, ბავშვებს უფასოდ ჩაუტარდებათ ფიზიო-სარეაბილიტაციო მასაჟის კურსიც.

"როგორც "სინაფსის" ხელმძღვანელი, კესანე საკანდელიძე ამბობს, არსებული სტრესული ვითარების ფონზე, დიუშენის სინდრომის მქონე ბავშვებს, ისევე, როგორც მათი ოჯახის წევრებს, ესაჭიროებათ კვალიფიციური ფსიქოლოგიური მხარდაჭერა, რასაც ცენტრი უპირობოდ გასწევს.

მრავალფუნქციური ფსიქოსოციოლოგიური ცენტრი "სინაფსი" თბილისის ცენტრში, აღმაშენებლის #55–ში მდებარეობს. მსურველებმა უნდა დარეკონ ტელეფონის ნომერზე — 511 744 400. ცენტრში მომსახურების მიღება შესაძლებელია ქართულ, ინგლისურ, რუსულ, გერმანულ, ჩინურ, არაბულ, სპარსულ (ფარსი) ენებზე", — ნათქვამია ინფორმაციაში.

შეგახსენებთ, რომ სამ კვირაზე მეტია, დიუშენის კუნთოვანი დისტროფიის მქონე ბავშვების მშობლები, შვილებისთვის ახალი თაობის სამკურნალო პრეპარატების შემოტანის მოთხოვნით, მთავრობის კანცელარიასთან ღამეებს ათევენ. საქართველოში ამ იშვიათი გენეტიკური დაავადების დიაგნოზით 80-მდე ბავშვი ცხოვრობს.

დიუშენის სინდრომით დაავადებული ბავშვების მშობლები სახელმწიფოსგან ოთხი ძირითადი პრეპარატის: ელევიდისის (Elevidys), ეგზონის სკიპერის (Exon-skipping), ჯივინოსტატისა (Givinostat) და ვამოროლონის (Vamorolone) შემოტანას ითხოვენ. მიუხედავად იმისა, რომ აშშ-ის მარეგულირებელმა ოთხივე მათგანზე გასცა ნებართვა, ხოლო ევროპამ — ორზე, საქართველოში მათი დანერგვა კვლავ ბიუროკრატიული და ეთიკური დისკუსიის საგანია. ხელისუფლება მედიკამენტების შემოტანაზე უარის თქმას არასაკმარისი კლინიკური გამოცდილებითა და უსაფრთხოების რისკებით ხსნის.