"დაიცავი ილიაუნის" 100-საათიანი მარათონი დასრულდა — სტუდენტებმა დიუშენის კუნთოვანი დისტროფიით დაავადებული ბავშვებისთვის 1 670 938 ლარის შეგროვება შეძლეს. თანხა დაავადებული ბავშვების მშობლებს გადაერიცხათ. "დაიცავი ილიაუნის" ცნობით, თანხის შეგროვება არ შეწყვეტილა და "შემდგომში შემოსული თითოეული ლარიც ბავშვებისთვის იქნება განკუთვნილი".

"დაიცავი ილიაუნის 100 საათიანი LIVE მარათონი უდიდესი წარმატებით დასრულდა!!!

ამჟამინდელი მონაცემებით შეგროვებულია 1 670 938, 48 ლარი. ეს არის მაჩვენებელი, რომელიც დაიცავი ილიაუნის გუნდისთვის მარათონის დაწყებამდე იყო წარმოუდგენელი და ეს ის მომენტია, როდესაც უსაზღვრო სიხარულით შეგვიძლია გამოვაცხადოთ — შევცდით!
უღრმესი მადლობა ყველას, ვინც ამ საამაყო შედეგის დაფიქსირებაში წვლილი შეიტანა. მადლობა საქართველოს მოსახლეობას, სტუდენტებს, ემიგრანტებს, კომპანიებს, ორგანიზაციებს, მცირე და მსხვილ ბიზნესებს და თითოეული თქვენგანს, ვინც თანხის შეგროვებასა და ინფორმაციის გავრცელებაში მიიღეთ მონაწილეობა!!!

ხალხი გაერთიანდა ერთი უმნიშვნელოვანესი იდეის გარშემო — ბავშვები იმსახურებენ ჯანმრთელობას. აგროვებული თანხის ოდენობა უმნიშვნელოვანესია და ამ რესურსით გაცილებით მეტის გაკეთების საშუალება მოგვეცა, ვიდრე მოლოდინი გვქონდა და ამ ყველაფერმა გამოკვეთა საზოგადოების პოზიცია. დიუშენის დისტროფიის მქონე ახალგაზრდების საჭირო მედიკამენტებით უზრუნველყოფა არა მხოლოდ ბავშვების ოჯახებისა და საზოგადოების მცირე ნაწილის, არამედ სრულიად საქართველოს მოთხოვნაა.

მარათონი დასრულდა და აქამდე შეგროვებული თანხა სრულიად გადაერიცხათ ბავშვების ოჯახებს. მაგრამ დაიცავი ილიაუნის ფონდი, რა საკვირველია, არ წყვეტს თანხის შეგროვებას და შემდგომში შემოსული თითოეული ლარიც ბავშვებისთვის იქნება განკუთვნილი.

დაიცავი ილიაუნის გუნდი აგრძელებს ბრძოლას საქართველოს ნათელი მომავლისთვის", — წერს "დაიცავი ილიაუნი" სოციალურ ქსელში.

დიუშენის სინდრომის მქონე ბავშვების დასახმარებლად კამპანიას ბიზნესსექტორის წარმომადგენლები, მათ შორის გამომცემლობები "არტანუჯი", "ინტელექტი", "პალიტრა ელ", "სულაკაურის გამომცემლობა", "საქართველოს უნივერსიტეტი", სხვადასხვა ბიზნესკომპანიები, მათ შორის "წიწილა", Auto Home, "ჩიკიტაი", "ფოტო ცენტრი", Khma, Arte, Trend House, "ქიდომატიკში", Zura's Bike Shop, "საკურა" და ა.შ.

საქველმოქმედო კამპანიის ფარგლებში დიუშენის დისტროფიის მქონე ბავშვების მხარდასაჭერად არტარეა ED მიმდინარე ერთი თვის შემოსავლის 10%-ს ფონდში გადარიცხავს;

23 მაისს, "ფოტო ცენტრის" სამივე ფილიალში განხორციელებული თითოეული ტრანზაქციიდან 1 ლარი დიუშენის დისტროფიის მქონე ბავშვების ფონდში გადაირიცხა;

"ჩიკიტაი" 22 მაისიდან ერთი კვირის მანძილზე ყველა გაყიდული პროდუქტიდან 10₾ გადაირიცხება დიუშენის კუნთოვანი დისტროფიის მქონე ბავშვების საჭიროებებისთვის;

Khma 22 მაისის გაყიდვებიდან მიღებული შემოსავლის ნაწილი, დიუშენის კუნთოვანი დისტროფიის მქონე ბავშვების მხარდასაჭერ ფონდში გადაირიცხა;

In Posteri 22 მაისიდან ერთი კვირის მანძილზე, თითოეული გაყიდული პოსტერიდან 5 ლარი დიუშენის კუნთოვანი დისტროფიის მქონე ბავშვების საჭიროებებისთვის გადაირიცხება;

Arte მაისის ბოლომდე შემოსული თითოეული შეკვეთიდან თანხის ნაწილს გადაირიცხავს დიუშენის დისტროფიის მქონე ბავშვების მხარდასაჭერად;

Trend House 23 და24 მაისს თითოეული ტრანზაქციიდან 1 ლარს დიუშენის დისტროფიის მქონე ბავშვების მხარდასაჭერად გადაირიცხა;

დიუშენის დისტროფიის მქონე ბავშვების მხარდასაჭერად 23 მაისიდან 31 მაისის ჩათვლით, "ქიდომატიკში" შესრულებული თითოეული ტრანზაქციიდან 1 ლარი ბავშვებისთვის გადაირიცხა;

დიუშენის დისტროფიის მქონე ბავშვების მხარდასაჭერად, 23 და 24 მაისს "არგეაში" ჩატარებული თითოეული თერაპიიდან თანხა ბავშვების ფონდში გადაირიცხა;

დიუშენის დისტროფიის მქონე ბავშვების მხარდასაჭერად 23 მაისიდან, 31 მაისის ჩათვლით, Zura's Bike Shop-ში შესრულებული თითოეული ტრანზაქციიდან 1 ლარი ბავშვებთან გადაირიცხება;

23 და 24 მაისს "საკურას" ორივე ფილიალში, ქუთაისსა და ბათუმში განხორციელებული თითოეული ტრანზაქციიდან 1 ლარი ფონდში გადაირიცხა.

შეგახსენებთ, მარათონი 20 მაისს, საღამოს 19:00 საათზე დაიწყო.