ბაქო-თბილისის მატარებელზე მგზავრობის საფასური, დაახლოებით, 127 ლარი (81 აზერბაიჯანული მანათი) იქნება. აღდგენილ მარშრუტზე რეისები შვეიცარიული ბრენდის, Stadler Rail Group-ის თანამედროვე, საძინებელი ტიპის მატარებლებით შესრულდება — ინფორმაციას აზერბაიჯანული რკინიგზა ავრცელებს.

განრიგის მიხედვით, მატარებელი ბაქოდან ყოველდღიურად 23:10 საათზე გავა და თბილისში მეორე დღეს, 08:41 საათზე ჩამოვა. თბილისიდან ბაქოს მიმართულებით მატარებელი 21:00 საათზე გავა და დანიშნულების ადგილზე 06:24 საათზე იქნება.

მგზავრობის დროიდან თითო საათი გამოყოფილი იქნება სასაზღვრო და საბაჟო შემოწმებისთვის — ერთი საათი აზერბაიჯანის, ხოლო მეორე საათი საქართველოს საზღვარზე.

ბაქო-თბილისის რეისზე, აზერბაიჯანის ტერიტორიაზე დაგეგმილია შემდეგი გაჩერებები — ბაქოს ცენტრალური რკინიგზის სადგური, ბილაჯარი, ევლახი, განჯა, აღსთაფა და ბოიუკ-კესიკი; ცოლო საქართველოს ტერიტორიაზე 2 სადგურში გაჩერდება მატარებელი. ესენია — გარდაბნის სადგური და თბილისის ცენტრალური რკინიგზის სადგური.

შეგახსენებთ, რომ 18 მაისს მთავრობის მეთაური ირაკლი კობახიძე აზერბაიჯანის რესპუბლიკის პრეზიდენტ ილჰამ ალიევს შეხვდა. ვიზიტის ფარგლებში გაფორმდა ორმხრივი საკოორდინაციო საბჭოს პროტოკოლი, რომლის თანახმად ბაქო-თბილისი-ყარსის ახალი სარკინიგზო მონაკვეთი სრულ ექსპლუატაციაში შევა და 6-წლიანი პაუზის შემდეგ, 26 მაისიდან ბაქო-თბილისის მატარებელი ყოველდღიურ მიმოსვლას აღადგენს.