11-15 მაისს თბილისი პირველ იბეროამერიკულ ლიტერატურულ ფესტივალს უმასპინძლებს. ფესტივალი რეგიონში პირველად ტარდება და ერთ სივრცეში გააერთიანებს თანამედროვე ესპანურენოვანი ლიტერატურის მწერლებს, მთარგმნელებსა და გამომცემლებს ესპანეთიდან, მექსიკიდან, ვენესუელიდან, კუბიდან და პერუდან. ინფორმაციას ამის შესახებ ორგანიზაცია სოციალურ ქსელში ავრცელებს.

ორგანიზატორების განცხადებით, ფესტივალის მთავარი მიზანი საქართველოსა და იბეროამერიკულ სამყაროს შორის ლიტერატურული და კულტურული კავშირების გაღრმავებაა.

ხუთდღიანი პროგრამის ფარგლებში დედაქალაქში ყოველდღიურად გაიმართება ლიტერატურული შეხვედრები, პანელური დისკუსიები, წიგნების პრეზენტაციები, პოეზიის კითხვა, კინოჩვენებები და თეატრალური წარმოდგენები.

ფესტივალი 11 მაისს ოფიციალურად გაიხსნება მექსიკელი მწერლის, დავიდ ტოსკანას წიგნის პრეზენტაციითა და დისკუსიით თემაზე — "იბეროამერიკული ლიტერატურა: გუშინ და დღეს".

12 მაისის პროგრამა თანამედროვე პროზას დაეთმობა — გაიმართება საუბრები 21-ე საუკუნის მოთხრობისა და თანამედროვე რომანის შესახებ, ასევე ვენესუელელი მწერლის, ხუან კარლოს მენდეს გედესის რომანის "შავი ქვიშა" ქართული თარგმანის წარდგენა.

13 მაისს მთავარი აქცენტი პოეზიასა და ლიტერატურულ თარგმანზე გაკეთდება — დაგეგმილია დისკუსიები, პოეზიის საჯარო კითხვა, "ვეფხისტყაოსნის" ახალი ესპანურენოვანი თარგმანის პრეზენტაცია, ასევე ესპანელი მწერლის, სარა მესას რომანის "სიყვარული" წარდგენა და მისი ეკრანიზაციის ჩვენება.

14 მაისს ფესტივალი წინანდლის მამული-ში გადაინაცვლებს, სადაც სტუმრებს ლექცია ლათინოამერიკულ ლიტერატურაზე, ესპანურენოვანი პოეზიის საღამო და ეროვნული კლასიკური თეატრის დასის სპეციალური წარმოდგენა ელოდებათ.

ფესტივალი 15 მაისს მარიო ვარგას ლიოსასადმი მიძღვნილი მემორიალური საღამოთი დასრულდება, რის შემდეგაც დასკვნით თეატრალურ პერფორმანსს ესპანეთის ნაციონალური კლასიკური თეატრის დასი გამართავს.

პროგრამის სრული კატალოგი შეგიძლიათ იხილოთ აქ.