თბილისის ჯერ კიდევ მოქმედი მერი, დავით ნარმანია ამბობს, რომ საქართველოს დატოვებას არ აპირებს და გუნდში რჩება. ამის შესახებ მან საზოგადოებრივ მაუწყებელს განუცხადა.

ჟურნალისტის კითხვაზე - სად მიდიხართ აქედან [თბილისის მერიიდან] გერმანიაში საქართველოს ელჩად თუ სემეკ-ში - ნარმანიამ ასე უპასუხა:

"ვრჩები საქართველოში. რაც შეეხება კონკრეტულ პოზიციას, წავალ იქ, სადაც ქვეყანას ყველაზე მეტად დავჭირდები და რაზეც მივიღებთ საბოლოო გადაწყვეტილებას... ვრჩები გუნდში და საქართველოში".

გუშინ, 21 ოქტომბერს საქართველოში თვითმმართველობის არჩევნები ჩატარდა. ცესკოს წინასწარი მონაცემებით, თბილისის მერი სახელისუფლებო პარტიის, ქართული ოცნების კანდიდატი, კახა კალაძე გახდა.