კანში ორი მეტოქე კინოჯგუფი ჩადის, რომლებსაც ფესტივალის საკონკურსო პროგრამაში ფილმები აქვთ წარდგენილი და საკუთარი შესაძლებლობების დამტკიცება სურთ. ერთი გუნდი კრუაზეტის გასწვრივ მდებარე პრესტიჟულ სასტუმროში ჩერდება, მეორე კი — განცალკევებულ, მთის ფერდობზე მდებარე რეზიდენციაში

ეს არის მაიკ უაითის პოპულარული ანთოლოგიური სერიალის, White Lotus-ის მე-4 სეზონის შინაარსი, რომელიც ამჯერად საფრანგეთის რივიერაზე ჩასული ამერიკელი ვარსკვლავების ისტორიით, კინოინდუსტრიის სატირას შემოგვთავაზებს. საქმეში კვლავ სასტუმროების ცნობილი ქსელი ფიგურირებს.

ეს არ არის პირველი შემთხვევა, როცა კანის კინოფესტივალი ეკრანზე მოხვდა: მაგალითად, Call My Agent-ის გადაღებები ფესტივალების სასახლის შიგნით მიმდინარეობდა. თუმცა, ფესტივალი ასეთი მასშტაბით აქამდე არასდროს გამოუყენებიათ. დაახლოებით 120 მილიონი დოლარის ბიუჯეტით, მე-4 სეზონი ყველაზე ამბიციური პროექტია, რომელმაც კანის კინოფესტივალი ცენტრალურ გარემოდ აირჩია. წარმოება დაახლოებით შვიდ თვეს გასტანს და საფრანგეთის რივიერასა და პარიზში წარიმართება. ინტერიერის სცენები გადაიღება Château de la Messardière-ში (რომელსაც White Lotus du Cap დაერქვა), სასტუმრო Martinez-სა (White Lotus Cannes) და პარიზის სასტუმრო Lutetia-ში.

ფოტო: Getty Images

მასშტაბის მიუხედავად, White Lotus საიდუმლოობას ინარჩუნებს. შესაძლოა ვინმემ იფიქროს, რომ HBO-ს პროდაქშენმა სამხრეთ საფრანგეთი თავდაყირა დააყენა, თუმცა მიუხედავად იმისა, რომ სენ-ტროპეს Château de la Messardière სრულად დაიკეტა და მისი 32-აკრიანი ბაღები საზოგადოებისთვის იზოლირებულია, ჭიშკარს სამოქალაქო ფორმაში გამოწყობილი ორი თანამშრომელი ფრთხილად იცავს, გადამღები ჯგუფის მანქანები კი ახლომდებარე პლაჟზეა გაჩერებული.

პროდაქშენი რომ უფრო შესამჩნევიც ყოფილიყო, ნაკლებად სავარაუდოა, რომ გულშემატკივრების ტალღა მიწყდომოდა. საფრანგეთში სერიალი Prime Video-სა და Canal+-ზე გადიოდა (სანამ HBO Max საკუთარ სერვისს გაუშვებდა) და ჯერ კიდევ არ ქცეულა ისეთ ფენომენად, როგორიც შტატებშია.

სენ-ტროპეს კაფეებში, ძვირადღირებულ მაღაზიებსა და ბარებში რეაქციები მერყეობდა კითხვებიდან "რა არის White Lotus?" და "ვინ არის მაიკ უაითი?" პასუხამდე — "ტელევიზორს არ ვუყურებ". კანში კი, სასტუმრო Martinez-ის მენეჯერმა კონფიდენციალურობის ხელშეკრულების გამო საუბარზე უარი თქვა, თუმცა პერსონალის წევრებმა საერთოდ არ იცოდნენ, რომ იქ გადაღებები იგეგმებოდა და არც სერიალს იცნობდნენ.

ამას ადგილობრივებისთვის ხელი არ შეუშლია, რომ გადასაღებ მოედანზე მოხვედრა ეცადათ. მასობრივი სცენებისთვის გამოცხადებულმა ქასთინგმა უამრავი ხალხი მიიზიდა და ბევრი მათგანი სწორედ ამ პროცესში ეცნობა სერიალს პირველად.

თავად ინდუსტრიაში კი White Lotus-ის გარშემო დიდი აჟიოტაჟია. ფრანგი მსახიობები სინჯებზე მასობრივად მივიდნენ. ვინსან კასელმა, რომელსაც ამერიკულ პროექტებში (Black Swan, Ocean’s Twelve) მონაწილეობის გამოცდილება აქვს, სასტუმროს მენეჯერის როლი მიიღო. ფრანგულ გუნდში ასევე შედიან ნადია ტერეშკევიჩი და ლორა სმეტი; ამ უკანასკნელმა პროექტში მოსახვედრად ადგილობრივ ტელეპროექტზე თქვა უარი.

ფოტო: Max-o-Matic for Variety

როგორც წინა სეზონებში (ჰავაი, სიცილია და ტაილანდი), კომედიის დიდი ნაწილი კულტურული უთანხმოებიდან წამოვა, რასაც საფრანგეთი უხვად გვპირდება. ამ უთანხმოებას კიდევ უფრო ამძაფრებს კანის გლამური. "როდესაც სერიალის მოქმედება კონკრეტულად კანის კინოფესტივალზე გადავიტანეთ, მაშინვე ამოტივტივდა დიდების თემა", — განაცხადა პროდიუსერმა დევიდ ბერნადმა აპრილში — "ვისზეა მიპყრობილი მსოფლიოს ყურადღება, ვის შეუძლია მისი მიპყრობა, ვინ არის უბრალოდ 'პლუს ერთი' ურთიერთობაში, ვის აქვს ძალაუფლება და როგორ აყალიბებს ეს დინამიკას".

მისი თქმით, მე-4 სეზონი ასახავს პერსონაჟების გზას ფესტივალის აღმასვლებისა და დაღმასვლების, აქ ყოფნის ტკივილის, სიყვარულისა და მღელვარების ფონზე. სტუმრებს შორის, რომლებიც უაითმა ამ სეზონისთვის შეარჩია, იყო ერთი პერსონაჟი, რომლისთვისაც დრამა უცხო არ არის.

Variety-ის წყაროების მიხედვით, უაითმა დაწერა პერსონაჟი: მინავლებული ვარსკვლავი, რომელიც დაბრუნებას ცდილობს. თავდაპირველად როლზე ჰელენა ბონემ კარტერი იყო დამტკიცებული, რომელმაც HBO-ს პროდაქშენი გადასაღებ მოედანზე გატარებული თითქმის ერთი კვირის შემდეგ დატოვა. მიზეზი "შემოქმედებითი უთანხმოება" გახდა, რაც უაითის მხრიდან ზედმეტად ექსცენტრიული შესრულების მოთხოვნას უკავშირდებოდა. რამდენიმე დღეში ის ლორა დერნით ჩაანაცვლეს.

ეს ნაცნობი ტერიტორიაა უაითისთვის: სანამ ჯენიფერ კულიჯს პირველ და მეორე სეზონებში გადაიღებდა, მან მისთვის დაწერა პროექტი Saint Patsy, სადაც კულიჯს უნდა ეთამაშა მსახიობი, რომელიც კინოფესტივალზე საპატიო ჯილდოს იღებს.

თუმცა კანი ნებისმიერი კინოფესტივალი არაა. ბერნადმა გაიხსენა მიმტანთან შეხვედრა, რომელმაც გადაწყვეტილება საბოლოოდ მიაღებინა: "ვახშამზე ვიყავით და გვქონდა ძალიან სპეციფიკური გამოცდილება მიმტანთან, ეს იყო ნამდვილი სტერეოტიპი". სერიალს, რომელიც მომსახურების სფეროს დინამიკაზეა ფოკუსირებული, მოულოდნელად ახალი ელემენტი დაემატა: ფრანგული გულგრილობა. "ეს ძალიან სასაცილო მომენტი იყო და მივხვდით, რომ სხვაგან არსად წავიდოდით. მაშინვე გავაუქმეთ ყველა სხვა ლოკაცია". კულტურული ჯახი სეზონის იუმორს კვებავს. Variety-ის წყაროების თანახმად, ერთ-ერთ სცენაში ვარსკვლავი ადმინისტრატორს ეჩხუბება, რათა არასამუშაო საათებში ნომერში მომსახურება მიიღოს.

მიუხედავად იმისა, რომ კანი სიუჟეტის "მფეთქავი გული" იქნება, ნამდვილი სამუშაო მაშინ დაიწყება, როცა კრუაზეტი დაიცლება. ქაოსის დროს გადაღების ნაცვლად, გუნდი კანის რეკონსტრუქციას მოახდენს ფესტივალის დასრულების მომდევნო დღეებში. თუმცა, მცირე ჯგუფი მაინც დააფიქსირებს ფესტივალის კადრებს, ხოლო უაითი და ქასთის წევრები, სანდრა ბერნჰარდი, სტივ კუგანი, კუმაილ ნანჯიანი და როზი პერესი, წითელ ხალიჩაზე მეორე კვირას სტუმრების სტატუსით გამოჩნდებიან.

გადამღებ ჯგუფზე შთაბეჭდილება მოახდინა ფრანგულმა პირდაპირობამ. "ეს ათავისუფლებს", — თქვა ბერნადმა — "ჰოლივუდში გეუბნებიან: 'კი, შესანიშნავია', წავლენ და მერე ამბობენ: 'ეს კაცი იდიოტია'. აქ კი ფრანგულ ჯგუფთან ძალიან გულწრფელი ურთიერთობა მაქვს". მან ასევე აღნიშნა, რომ აქ არის საუკეთესო კვება, რაც კი ოდესმე ჰქონიათ და სიამოვნებით უყურებს ლანჩზე ყველგან დადგმულ ღვინის ჭიქებს, რაც ძველი კინოწარმოებისადმი მიგებულ პატივს ჰგავს.

ქალაქ კანისთვის ეს პროდაქშენი დიდი მონაპოვარია. მას შემდეგ, რაც მეორე სეზონი სიცილიაში წავიდა, ქალაქმა ყველაფერი გააკეთა სერიალის მოსაზიდად. პროდაქშენი კანში დაახლოებით 50 დღეს იმუშავებს, რაც ქალაქს 17,000 სასტუმრო ღამეს მოუტანს. "ეს არ არის მხოლოდ ლოკაციის ჩვენება, ეს ქალაქის გაცოცხლებაა", — ამბობს ვიცე-მერი სოფი მუსეტი.

თუმცა, HBO ზაფხულის პიკის დროს სამხრეთ საფრანგეთს დატოვებს, რათა გზა ტურისტებს დაუთმოს. ივნისში გადაღებები პარიზის Hôtel Lutetia-ში გადაინაცვლებს, რომელიც ჩარლი ჩაპლინისა და ერნესტ ჰემინგუეის მეორე სახლად ითვლებოდა, შემდეგ კი კვლავ რივიერას დაუბრუნდება.

გარდა ეკონომიკური სარგებლისა, კანის კინოფესტივალის ფონად გამოყენება ხაზს უსვამს მის მუდმივ მიზიდულობას. "ხელოვანებისთვის ამაზე დიდებული ადგილი არ არსებობს", — ამბობს ბერნადი — "ეს ყველაზე დიდი ოცნებაა. 8 წლის ბავშვივით ვარ, ერთადერთი, რაც მინდა, არის ის, რომ კანის საკონკურსო პროგრამაში ფილმი მქონდეს და ის ფესტივალების სასახლეში აჩვენონ".

სერიალის მეოთხე სეზონის პრემიერა 2027 წელს იგეგმება.