სომხეთის საგარეო საქმეთა სამინისტროს ცნობით, 28 აპრილს სომხეთისა და თურქეთის წარმომადგენლებმა ორ ქვეყანას შორის რკინიგზის აღდგენის საკითხზე სამუშაო ჯგუფის შეხვედრა გამართეს.

"სომხეთ-თურქეთის ურთიერთობების ნორმალიზების ფარგლებში მიღწეული შეთანხმებების შესაბამისად, 28 აპრილს ყარსში გაიმართა გიუმრის (სომხეთი) — ყარსის (თურქეთი) რკინიგზის აღდგენისა და ექსპლუატაციის საკითხზე სომხეთ-თურქეთის ერთობლივი სამუშაო ჯგუფის შეხვედრა", — აცხადებს სამინისტრო.

აშშ-ის საელჩომ სომხეთში სამუშაო ჯგუფის შეხვედრას "ისტორიული პროგრესი" უწოდა "მშვიდობიანი და განვითარებული სამხრეთ კავკასიისკენ".

"სომხეთსა და თურქეთს შორის ამ საკვანძო სატრანსპორტო კავშირის აღდგენა მნიშვნელოვანი ნაბიჯია რეგიონული სატრანსპორტო მარშრუტების გახსნისა და რეგიონული სტაბილურობის უზრუნველყოფის კუთხით. ამ მნიშვნელოვანი მოვლენის საფუძველი 8 აგვისტოს ვაშინგტონში გამართულ სამიტზე ჩაეყარა, რომელსაც პრეზიდენტი ტრამპი მასპინძლობდა. სომხეთში აშშ-ის საელჩო მიესალმება სომხეთსა და თურქეთს შორის ეკონომიკური და სოციალური კავშირების აღდგენისკენ გადადგმულ ამ კონკრეტულ ნაბიჯებს", — განაცხადა ამერიკის დიპლომატიურმა მისიამ.

ანკარასა და ერევანს დიპლომატიური ურთიერთობები არ აქვთ; საზღვარი 1993 წლიდან ანკარის ინიციატივით არის ჩაკეტილი. 2022 წლიდან ერევანი და ანკარა სპეციალური წარმომადგენლების დონეზე აწარმოებენ მოლაპარაკებებს საზღვრის გახსნისა და ურთიერთობების ნორმალიზების შესახებ. ქვეყნებს შორის საჰაერო მიმოსვლა არსებობს.

2025 წლის აგვისტოში სომხეთის პრემიერ-მინისტრმა ნიკოლ ფაშინიანმა და აშშ-სა და აზერბაიჯანის პრეზიდენტებმა დონალდ ტრამპმა და ილჰამ ალიევმა ხელი მოაწერეს დეკლარაციას, რომლის თანახმადაც ერევანი იმუშავებს ვაშინგტონთან და გარკვეულ მესამე მხარეებთან სომხეთში TRIPP-ის (ტრამპის მარშრუტი საერთაშორისო მშვიდობისა და კეთილდღეობისთვის) პროექტის ჩარჩოს შესამუშავებლად. პროექტი მოიცავს გზების, რკინიგზის და ნავთობისა და გაზის ინფრასტრუქტურის მშენებლობას. TRIPP პროექტი აზერბაიჯანის მატერიკულ ნაწილს ნახჭევანის ავტონომიურ რესპუბლიკასთან სომხეთის გავლით 42 კილომეტრიანი გზით დააკავშირებს, შემდეგ კი თურქეთს.