ამ ზაფხულს ეკრანებს Ted Lasso უბრუნდება: სერიალის მეოთხე სეზონი, რომელშიც მთავარ როლს ჯეისონ სუდეიკისი ასრულებს, 5 აგვისტოს დაიწყება. ეპიზოდები 7 ოქტომბრამდე ყოველკვირეულად გამოვა. სუდეიკისი, მსახიობობასთან ერთად, სერიალის აღმასრულებელი პროდიუსერიცაა.

სუდეიკისთან ერთად პროექტში ბრუნდებიან ჰანა უადინგემი, ჯუნო ტემპლი, ბრეტ გოლდსტეინი, ბრენდან ჰანტი და ჯერემი სვიფტი. მათ სამსახიობო გუნდში ახალი წევრებიც შეუერთდებიან: ტანია რეინოლდსი, ჯუდ მაკი, ფეი მარსეი, რექს ჰეისი, აისლინგ შარკი, ები ჰერნი და გრანტ ფილი.

გასული სეზონის ბოლოს ტედ ლასომ AFC Richmond-ის მწვრთნელის პოსტი დატოვა და შტატებში შვილთან მეტი დროის გასატარებლად გაემგზავრა, ახლა კი სრულიად ახალ გამოწვევას ეჭიდება: რიჩმონდის ქალთა ახალ გუნდს უნდა უხელმძღვანელოს. ამ გუნდის შექმნაზე გასული სეზონის ფინალში რებეკა უელტონმა (ჰანა უადინგემი) და კილი ჯონსმა (ჯუნო ტემპლი) მიანიშნეს. ტრეილერში ჩანს, როგორ ცდილობს სუდეიკისი ახალგაზრდა იმედისმომცემი გოგოების გაწვრთნას, ხოლო ერთ-ერთ სცენაში მას ტრადიციულად დასცინიან ამჯერად "გოგოების გუნდის წვრთნის" გამო.

"სეზონის განმავლობაში ტედი და გუნდი სწავლობენ, რომ ჯერ გადახტნენ და შემდეგ გაიხედონ; ისინი იყენებენ შანსებს, რომლებზეც ადრე ვერც კი იოცნებებდნენ", — ნათქვამია სინოფსისში.

მესამე სეზონი რიჩმონდისთვის ემოციური გამოდგა, გუნდმა West Ham United დაამარცხა და პრემიერ ლიგის ჩემპიონობამდე სულ ცოტა დააკლდა. ლასოს წასვლის შემდეგ კი კლუბის მთავარი მწვრთნელის ადგილი ყოფილმა მოთამაშემ და ასისტენტმა, როი კენტმა (ბრეტ გოლდსტეინი) დაიკავა. ბრეტ გოლდსტეინი ასევე არის სერიალის სცენარისტი და აღმასრულებელი პროდიუსერი ლიან ბოუენთან, სარა უოკერთან და ფიბი უოლშთან ერთად.