შრი-ლანკის საერთაშორისო აეროპორტში, ტაილანდიდან დაბრუნებული 22 შრი-ლანკელი ბერი დააკავეს, რომლებსაც რეკორდული რაოდენობის დაახლოებით 110 კილოგრამი კანაფი აღმოაჩნდათ — ამის შესახებ ინფორმაციას ოფიციალური პირებზე დაყრდნობით CBS news ავრცელებს.

შრი-ლანკის საბაჟოს წარმომადგენლის განცხადებით, ჯგუფს, რომელიც ტაილანდის დედაქალაქში ოთხდღიანი შვებულების შემდეგ სახლში ბრუნდებოდა, ბარგში "კუში", კანაფის ერთ-ერთი ყველაზე ძლიერი სახეობა, ჰქონდა დამალული.

"თითოეულ მათგანს ბარგის ორმაგ კედელში დამალული დაახლოებით ხუთი კილოგრამი ნარკოტიკი გადაჰქონდა", — განაცხადა სპიკერმა და დასძინა, რომ ბერები უკვე გადაეცენ პოლიციას.

საბაჟო სამსახურის წარმომადგენლების თქმით, ეს არის "კუშის" ყველაზე დიდი პარტია, რომელიც სამხრეთ აზიის ამ ქვეყნის მთავარ აეროპორტში ოდესმე ამოუღიათ.

CBS news წერს, რომ ეს არ არის პირველი შემთხვევა, როდესაც ბერები ნარკოტიკებთან დაკავშირებული კანონების დარღვევის გამო დააკავეს: 2022 წელს, ცენტრალურ ტაილანდში მდებარე ბუდისტური ტაძრის ყველა ბერს სტატუსი მას შემდეგ ჩამოერთვა, რაც მათ ორგანიზმში მეტამფეტამინი აღმოჩნდა. ბერები სარეაბილიტაციო კლინიკაში გადაიყვანეს.

2017 წელს კი, მიანმარში პოლიციამ ბუდისტი ბერი დააკავა, რომლის მანქანასა და მონასტერში 4 მილიონზე მეტი მეტამფეტამინის აბი იპოვეს.