უკრაინული დრონების თავდასხმამ რუსეთში, შავ ზღვაზე მდებარე ტუაფსეს ნავთობგადამამუშავებელ ქარხანაში "მასშტაბური ხანძარი" გამოიწვია, რის გამოც ახლომდებარე შენობებიდან მოსახლეობის ევაკუაცია გახდა საჭირო — ამის შესახებ ადგილობრივმა ოფიციალურმა პირებმა განაცხადეს. ინფორმაციას Reuters ავრცელებს.

კომპანია "როსნეფტის" (Rosneft) კუთვნილი ქარხანა ნავთობპროდუქტებს ძირითადად ექსპორტისთვის აწარმოებს, თუმცა Reuters-ის წყაროების ცნობით, საწარმოს მუშაობა ჯერ კიდევ 16 აპრილიდან, წინა დრონების თავდასხმის გამო, იყო შეჩერებული.

უკრაინას ამ ცნობებთან დაკავშირებით მყისიერი კომენტარი არ გაუკეთებია. Reuters წერს, რომ კიევმა რუსეთზე იერიშები მარტის შემდეგ გააქტიურა, მაშინ როცა აშშ-ის შუამავლობით მიმდინარე მოლაპარაკებები უკრაინის ომზე შეჩერებულია და ვაშინგტონი ძირითადად ირანის ომზეა ფოკუსირებული.

"ტუაფსეში კიდევ ერთი სერიოზული ინციდენტი მოხდა. დრონების თავდასხმის შემდეგ ნავთობგადამამუშავებელ ქარხანაში მასშტაბური ხანძარი გაჩნდა", — დაწერა სამშაბათს კრასნოდარის მხარის გუბერნატორმა, ვენიამინ კონდრატიევმა Telegram-ზე.

ტუაფსეს რაიონის ხელმძღვანელმა, სერგეი ბოიკომ, ხანძრის გავრცელების საფრთხის გამო ქარხნის მიმდებარე ქუჩების ევაკუაციის ბრძანება გასცა. ტუაფსეს ქარხანასა და პორტზე ერთ-ერთი ბოლო თავდასხმის შედეგად ზღვაში ნავთობი ჩაიღვარა და ხანძარიგაჩნდა, რომლის ჩაქრობასაც რამდენიმე დღე დასჭირდა.

გასულ კვირას ადგილობრივ მცხოვრებლებს მოუწოდეს, სახლებში დარჩენილიყვნენ, არ გაეღოთ ფანჯრები და გაეწმინდათ ზედაპირები მას შემდეგ, რაც წინა თავდასხმებით გამოწვეული ხანძრის ნარჩენები ნალექს შეერია და ტერმინალის მიმდებარე ტერიტორიებზე "შავი ნადები" წარმოქმნა.

Reuters-ის ცნობით, ტუაფსეს ქარხნის წლიური საწარმოო სიმძლავრე დაახლოებით 12 მილიონ ტონას (ანუ დღეში 240,000 ბარელს) შეადგენს. ის აწარმოებს ნაფტას, დიზელს, მაზუთსა და ვაკუუმურ გაზოილს.