პოლონეთის საზოგადოებრივმა მაუწყებელმა — TVP-მ ქართლოენოვანი განყოფილება გახსნა. ამის შესახებ ინფორმაცია პოლონეთის საგარეო საქმეთა სამინისტრომ პლატფორმა X-ზე გაავრცელა. ტელეარხი Vot Tak-ის ინფორმაციით, რომელიც პოლონური საზმაუს რუსულენოვანი პროექტია, VT Sakartvelo News-ის პირველი გადაცემა პოლონეთის საზოგადოებრივი მაუწყებლის ეთერში 27 აპრილს გავიდა.

"VT Sakartvelo News უკვე ხელმისაწვდომია — ეს არის პოლონეთის საჯარო საზოგადოებრივი მაუწყებლის, TVP-ის, ახალი ქართულენოვანი საინფორმაციო განყოფილებაა.

პროგრამა უზრუნველყოფს სანდო ინფორმაციას, ევროპულ პერსპექტივას და ხელს უწყობს რეგიონში დეზინფორმაციასთან ბრძოლას.

გადაცემა გადის Belsat-ზე და ასევე ხელმისაწვდომია VT Sakartvelo News-ის ოფიციალურ YouTube არხზე" — წერია X-ზე.

როგორც ბელორუსული საინფორმაციო გამოშვება Vot Tak ოფიციალურ გვერდზე წერს, გადაცემა ორშაბათიდან პარასკევის ჩათვლით Belsat TV-ის ეთერში გადაიცემა, ხოლო ახალი ეპიზოდები ხელმისაწვდომი იქნება YouTube-სა და Facebook-ზე. პროექტი გათვლილია როგორც საქართველოში, ისე მის ფარგლებს გარეთ მცხოვრები ქართულენოვანი აუდიტორიისთვის.

პროექტის გუნდი შედგება საქართველოსა და პოლონეთში მოღვაწე ჟურნალისტებისგან. გადაცემას კი გაუძღვებიან ნათია კობერიძე, სოფიო ნაცვლიშვილი და რატი მუჯირი.

ჟურნალისტები აცხადებენ, რომ პროექტი მიზნად ისახავს მაყურებლისთვის სანდო, დაბალანსებული ინფორმაციის მიწოდებასა და დეზინფორმაციასთან ბრძოლას.

"ჩვენ ვეწინააღმდეგებით პროპაგანდას და გთავაზობთ ობიექტურ ინფორმაციას”, — წერია VT Sakartvelo News-ის გვერდზე.

ჟურნალისტ რატი მუჯირის თქმით, ახალი პლატფორმის შექმნა განსაკუთრებით მნიშვნელოვანი არსებული გამოწვევების ფონზეა:

"არსებული გამოწვევების გათვალისწინებით, საქართველოსთვის მნიშვნელოვანია კიდევ ერთი პლატფორმის გახსნა, სადაც საზოგადოებას შეძლებებს მიიღოს მაღალი ჟურნალისტური სტანდარტების შესაბამისი თავისუფალი და დაბალანსებული ინფორმაცია. ჩვენ გვსურს ვილაპარაკოთ სიმართლე და წამოვწიოთ საკითხები, რომლებიც სხვა შემთხვევაში შეიძლება უთქმელი დარჩენიილიყო", — აღნიშნა ჟურნალისტმა.

ცნობისთვის, VT Sakartvelo News TVP-ის საერთაშორისო პროექტების ერთ-ერთი ნაწილია. თებერვალში Vot Tak-მა რუმინულენოვანი საინფორმაციო პროექტი VT Moldova News გაუშვა, რომელმაც მოკლე დროში — 1.9 მილიონზე მეტი ონლაინ მომხმარებელი და 5.5 მილიონი ნახვა დააგროვა.

ამავე პლატფორმამ მარტში სომხურენოვანი VT Hayastan News დაიწყო, რომელმაც მსგავს წარმატებას მიაღწია. პროექტის გაშვებისთანავე, სომხეთის ერთ-ერთმა ყველაზე პოპულარულმა რადიოსადგურმა მას გადაცემების ხელახალი ტრანსლაციაც შესთავაზა.