თუკი სამეგობროში ფოტოს გადაღებას არავინ განდობს ხოლმე, გამოუვალ მდგომარეობაში კი, სულ მცირე, 100 ფოტოს გაღებინებენ, რომ ერთმა მაინც ივარგოს, სწორედ ის ყოფილხარ, ვისაც ისლანდიაში მოუთმენლად ელოდებიან.

მოკლედ, ისლანდიის ავიახაზებს ვაკანსია აქვს. კომპანია Icelandair ეძებს "ძალიან ცუდ" ფოტოგრაფს, რომელიც კუნძულოვან ქვეყანაში 10 დღით გაემგზავრება და მოგზაურობას ფოტოსურათებზე აღბეჭდავს. შეთავაზება მოიცავს მოგზაურობის ხარჯების სრულად ანაზღაურებას, ამასთან, გათვალისწინებულია ბონუსი $50 ათასის ოდენობით.

რა მოთხოვნებს უნდა აკმაყოფილებდე?

იმისათვის, რომ ეს დაუჯერებელი შეთავაზება გერგოს, უნდა დაამტკიცო, რომ მართლა საშინელი ფოტოგრაფი ხარ. უფრო ზუსტად, სავალდებულო მოთხოვნაა, რომ არ გქონდეს პროფესიონალური ფოტოგრაფობის გამოცდილება და არც ფოტოგრაფიის სწავლისადმი ინტერესი არ გაგაჩნდეს. თუმცა, დაუფიქრებლად უნდა შეგეძლოს ფოტოების გადაღება ტელეფონით ან სამოყვარულო კამერით. ცხადია, უნდა გიყვარდეს მოგზაურობა და ლაშქრობაც.

რაც შეეხება ოფიციალურ მოთხოვნებს, ასაკით უნდა იყო 21 წელზე მეტის, უნდა გქონდეს მოქმედი პასპორტი, შეგეძლოს გამგზავრება ისლანდიაში, აშშ-სა და გაერთიანებულ სამეფოში. ამასთან, არ უნდა გქონდეს დანაშაულებრივი წარსული.

აპლიკაციის შესავსებად, საჭიროა, ჩაწერო მაქსიმუმ 1-წუთიანი ვიდეო, სადაც მოჰყვები, რატომაა ეს ვაკანსია შენთვის ზედგამოჭრილი. ამასთან, ცალკე უნდა უპასუხო ექვს მარტივ შეკითხვას:

• როგორ შეაფასებდი საკუთარ ფოტოგრაფიულ უნარებს?
• როგორი გამოდის ხოლმე შენი ფოტოები მეგობრების ნამუშევრებთან შედარებით?
• რამდენად კარგად ფლობ ინგლისურ ენას?
• რა რეაქცია აქვს ხალხს შენი ფოტოების ნახვისას?
• მოგზაურობისას თუ კურიოზი გადაგხდა, როგორ იქცევი?
• რამდენად კომფორტულად გრძნობ კამერის წინ თავს?

რატომ ეძებენ ცუდ ფოტოგრაფს?

მოგზაურობის დიდი მოყვარული რომც არ იყო, უთუოდ გეცოდინება, რომ ისლანდია, გეიზერების, ვულკანებისა და ჩრდილოეთის ციალის მიწა, არაამქვეყნიური სილამაზით გამოირჩევა. Icelandair-ის შეთავაზების მიზანიც სწორედ ამის დამტკიცებაა.

"გვინდა, ყველას ვაჩვენოთ, რომ ისლანდიის ბუნებრივი სილამაზე ისეთი თვალწარმტაცია, ყველაზე საშინელი ფოტოებიც კი ვერაფერს აკლებს", — აცხადებს კომპანიის ბრენდმენეჯერი, გუდრუნ ჰარალდსდოტირი, — "ფოტოები ბუნდოვანი გამოგდის? საშინელ კომპოზიციას არჩევ ხოლმე? ყველა კადრში შენი ცერი მოჩანს? აი, ზუსტად ეგეთ რაღაცებს ვეძებთ. გვინდა, ნამდვილი მომენტები აღბეჭდო, ყოველგვარი ფილტრისა და დამუშავების გარეშე".

როდის გაემგზავრება იღბლიანი ცუდი ფოტოგრაფი ისლანდიაში?

მოთხოვნების მიხედვით, ამ წლის ივნისში 10 დღის გამოთავისუფლება უნდა შეგეძლოს. აპლიკაციის გაგზავნის ბოლო ვადა კი 30 აპრილი გახლავს.

ჰო, მართლა — შეთავაზებით დაინტერესებულ ადამიანებს კომპანია ურჩევს, უცაბედი პოპულარობისთვის მზად იყვნენ, რადგან ცუდი ფოტოგრაფის ნამუშევრებს გლობალური კამპანიის ფარგლებში გამოიყენებენ.