მიხეილ ყაველაშვილმა აჭარის ავტონომიური რესპუბლიკის მთავრობის თავმჯდომარეობის კანდიდატად ზურაბ პატარაძე წარადგინა.

"აჭარის ავტონომიური რესპუბლიკის უმაღლეს საბჭოს მთავრობის თავმჯდომარის თანამდებობაზე დასამტკიცებლად ბატონ ზურაბ პატარაძის კანდიდატურა წარვუდგინე. გადაწყვეტილება მივიღე აჭარის უმაღლეს საბჭოში წარმოდგენილ პოლიტიკურ სუბიექტებთან კონსულტაციისა და საქართველოს პრემიერმინისტრის თანახელმოწერის საფუძველზე.

ზურაბ პატარაძეს აქვს სახელმწიფო სამსახურში მრავალწლიანი გამოცდილება, ის წლების განმავლობაში ნაყოფიერად და წარმატებულად მოღვაწეობდა დიპლომატიურ სამსახურში, სადაც ღირსეულად იცავდა საქართველოს ინტერესებს საერთაშორისო ასპარეზზე. მას მინიჭებული აქვს საგანგებო და სრულუფლებიანი ელჩის დიპლომატიური რანგი.

2016-2018 წლებში ბატონი ზურაბი იკავებდა აჭარის ავტონომიური რესპუბლიკის მთავრობის თავმჯდომარის პოზიციას, სწორედ მის სახელს უკავშირდება რეგიონში არაერთი მნიშვნელოვანი და წარმატებული პროექტის განხორციელება. ასევე, ბატონი ზურაბი გახლავთ აჭარელი, ის ზედმიწევნით კარგად იცნობს მხარის საჭიროებებსა და მის პოტენციალს.

დარწმუნებული ვარ, საკუთარ ცოდნასა და მდიდარ გამოცდილებაზე დაყრდნობით იგი კვლავაც ეფექტიანად გააგრძელებს საქმიანობას რეგიონის საკეთილდღეოდ" — განაცხადა მიხეილ ყაველაშვილმა.

პატარაძემ მადლობა გამოუცხადა ოცნების გუნდს ნდობისთვის და განსაკუთრებით გამოყო პარტიის საპატიო თავმჯდომარე ბატონ ბიძინა ივანიშვილი, რომელმაც, მისი თქმით, "ძალიან დიდი წვლილი შეიტანა ქვეყნის აღმშენებლობაში".

"მინდა, ძალიან დიდი მადლობა გამოგიცხადოთ ნდობისათვის, ეს არის ჩემთვის ძალიან დიდი პასუხისმგებლობა და, რა თქმა უნდა, ეს არის გამოწვევაც, რომელსაც ჩვენს გუნდთან ერთად ღირსეულად ვუპასუხებთ, რათა მივიღოთ მონაწილეობა და გავაგრძელოთ ის მნიშვნელოვანი საქმეები, რომელიც დაწყებულია, რომელიც გრძელდება და რა თქმა უნდა ყველაფერს გავაკეთებთ ჩვენი კუთხის, ჩვენი მშობლიური აჭარის საკეთილდღეოდ.

[...] რა თქმა უნდა, ჩვენ ვაგრძელებთ მუშაობას ჩვენ გუნდთან ერთად და ამ კონტექსტში მინდა, განსაკუთრებულად დიდი მადლობა გადავუხადო ჩვენი პარტიის საპატიო თავმჯდომარეს, ბატონ ბიძინა ივანიშვილს, რომელმაც ძალიან დიდი წვლილი შეიტანა ჩვენი ქვეყნის აღმშენებლობაში და ჩვენ, როგორც რიგითი ჯარისკაცები, ყველაფერს გავაკეთებთ ჩვენი ქვეყნის საკეთილდღეოდ", — განაცხადა აჭარის მთავრობის თავმჯდომარედ წარდგენილმა ზურაბ პატარაძემ.

ზურაბ პატარაძე 2016 წლის ივლისიდან 2018 წლის ივლისამდე აჭარის ავტონომიური რესპუბლიკის მთავრობის თავმჯდომარე იყო, ხოლო 2018 წლის 29 აგვისტოდან — საქართველოს საგანგებო და სრულუფლებიანი ელჩი აზერბაიჯანში.