წინასწარი შედეგები აჩვენებს, რომ ყოფილი პრეზიდენტი რუმენ რადევის პარტია ბულგარეთის საპარლამენტო არჩევნებში მკაფიო უმრავლესობით იმარჯვებს. როგორც DW წერს, ეს არის ყველაზე დიდი შედეგი ერთი პოლიტიკური ძალისთვის 1997 წლის შემდეგ.

ეს გამარჯვება ზრდის მოლოდინს, რომ ბულგარეთმა შესაძლოა მრავალწლიანი პოლიტიკური კრიზისისა და არასტაბილური კოალიციური მთავრობების ეპოქა დაასრულოს.

"პროგრესულმა ბულგარეთმა დამაჯერებლად გაიმარჯვა. ეს არის იმედის გამარჯვება უნდობლობაზე, თავისუფლების გამარჯვება შიშზე,“ — განაცხადა რადევმა.

არჩევნების შედეგებმა მძიმე დარტყმა მიაყენა ტრადიციულ პოლიტიკურ ძალებს. მეორე ადგილზე გასულმა GERB-მა, რომელსაც ყოფილი პრემიერმინისტრი ბოიკო ბორისოვი ხელმძღვანელობს, ხმათა მხოლოდ 13.4% დააგროვა. მნიშვნელოვნად დასუსტდა ასევე DPS და სხვა პარტიები, რომლებიც წინა კოალიციაში იყვნენ წარმოდგენილი.

ამასთან, პირველად პოსტსაბჭოთა პერიოდის შემდეგ, ბულგარეთის სოციალისტური პარტია ვერ მოხვდა პარლამენტში, რაც კიდევ უფრო უსვამს ხაზს ამომრჩევლის განწყობას ცვლილებებისკენ.

არჩევნების პარალელურად დაფიქსირდა დარღვევების არაერთი შემთხვევაც. ბულგარეთის შინაგან საქმეთა სამინისტრომ განაცხადა, რომ ამოიღო 1.2 მილიონ ევროზე მეტი, რომელიც სავარაუდოდ ხმების მოსყიდვას უნდა მოხმარებოდა და დააკავა ასობით პირი. თუმცა, როგორც შსს-მ აღნიშნა, ხმების მოსყიდვის შესახებ ყველაზე მეტი საჩივარი GERB-ისა და DPS პარტიის მიმართ დაფიქსირდა.

მიუხედავად ძლიერი მანდატისა, რადევს სერიოზული გამოწვევები ელოდება. მის მთავარ ამოცანებს შორისაა — ინფლაციის შემცირება, 2026 წლის ბიუჯეტის მიღება და სასამართლო სისტემის რეფორმა. თუმცა კონსტიტუციური ცვლილებებისთვის მას სხვა პარტიების მხარდაჭერა მაინც დასჭირდება.

ექსპერტების შეფასებით, საზოგადოებაში ორი მთავარი მოლოდინია: სამართლის აღდგენა და სტაბილურობა.

ცნობისთვის, საგარეო პოლიტიკის მიმართულებით რადევის პოზიციები სადისკუსიო თემად უკვე იქცა. არჩევნების პერიოდში მან თავი შეიკავა რუსეთის პრეზიდენტის, ვლადიმერ პუტინის ქმედებების გაკრიტიკებისგან და არ გამორიცხა მოსკოვთან დიალოგიც, რაც ამომრჩეველთა ნაწილისა და დასავლელი პარტნიორების შეშფოთებას იწვევს.

ამ ეტაპზე ბულგარეთი ძლიერი ერთპარტიული მმართველობის პირობებში ახალი პოლიტიკური რეალობის წინაშეა. თუმცა, მთავარი კითხვა კვლავ ღიად რჩება: შეძლებს თუ არა რუმენ რადევი ამ მანდატის გამოყენებას სტაბილურობისა და რეალური ცვლილებების მისაღწევად?