პრორუსულად განწყობილი ყოფილი პრეზიდენტი რუმენ რადევი ბულგარეთის საპარლამენტო არჩევნებში ლიდერობს, რამაც შესაძლოა ქვეყნის მრავალწლიანი პოლიტიკური არასტაბილურობაც დაასრულოს. ამის შესახებ ინფორმაციას Reuters ავრცელებს.

რადევის Progressive Bulgaria პარტიამ ბიულეტენების 60%-ის დათვლის შემდეგ ხმების 44.6% მიიღო, რაც იმაზე მიუთითებს, რომ მას შეუძლია ერთპარტიული, ძლიერი უმცირესობის მთავრობა ჩამოაყალიბოს, თუმცა არ გამორიცხავს კოალიციას პროევროპულ ან უფრო მცირე პარტიებთანაც.

Progressive Bulgaria-ს შედეგები მნიშვნელოვნად აღემატება პროევროპულ კოალიციის We Continue the Change–Democratic Bulgaria-ს შედეგებს, რომელმაც ხმათა 14,2% აიღო, ხოლო პარტია GERB-მა, რომელსაც ყოფილი პრემიერ-მინისტრი ბოიკო ბორისოვი ხელმძღვანელობს, — 13%.

"ეს არის იმედის გამარჯვება უნდობლობაზე, თავისუფლების — შიშზე, და ბოლოს, თუ გნებავთ, მორალის გამარჯვება", — განაცხადა რადევმა კვირას გამართულ პრესკონფერენციაზე, საბოლოო შედეგების გამოცხადებამდე ერთი დღით ადრე.

რადევმა პრეზიდენტის პოსტი იანვარში დატოვა, რათა არჩევნებში მიეღო მონაწილეობა. მისი გადაწყვეტილება მასობრივი საპროტესტო ტალღის ფონზე მიღებულ პოლიტიკურ კრიზისს მოჰყვა, რომელმაც წინა ხელისუფლების გადადგომა გამოიწვია.

ანალიტიკოსების თქმით, რადევის წარმატება მეტწილად განპირობებულია ამომრჩეველთა უკმაყოფილებით — კორუფციის, მუდმივი პოლიტიკური კრიზისისა და ძველი პარტიების მიმართ უნდობლობის გამოცხადების გამო.

რადევის შესაძლო გამარჯვებამ კითხვები გააჩინა ქვეყნის საგარეო პოლიტიკის მიმართულებაზე. მისი განცხადებები მოსკოვთან ურთიერთობების გაუმჯობესებისა და რუსული ენერგორესურსების აღდგენის შესახებ შეადარეს უნგრეთის ყოფილ პრემიერ-მინისტრს ვიქტორ ორბანს.

ამასთან, რადევმა უკვე განაცხადა, რომ მზად არის ითანამშრომლოს პროევროპულ ძალებთან და გააგრძელოს ბულგარეთის ევროპული კურსი, მიუხედავად იმისა, რომ მან ადრე გააკრიტიკა ქვეყნის ევროზონაში გაწევრიანება.

ბულგარეთი, რომელიც NATO-სა და ევროკავშირის წევრია, ბოლო ათწლეულებში მნიშვნელოვნად განვითარდა, თუმცა სერიოზულ გამოწვევებს კვლავ აწყდება — მათ შორის ეკონომიკურ და დემოგრაფიულ კრიზისს.

ანალიტიკოსების შეფასებით, მიუხედავად არჩევნებში გამარჯვების შანსისა, რადევის წინაშე რთული ამოცანები დგას და ჯერ კიდევ უცნობია, რამდენად ეფექტურად შეძლებს ის ქვეყანაში არსებული პრობლემების გადაჭრას.