ტირილი რომ ემოციის გამოხატვის ყველაზე უნივერსალური, ბუნებრივი და გავრცელებული ფორმაა, ახალი ამბავი არ არის — სიხარულიც, ტკივილიც, სევდაც და დაღლაც გაგვიყოლებია ცრემლებისთვის და შვებაც გვიგრძნია.

თუმცა, ბევრმა ჩვენგანმა არც იცის, რომ ეს შვება მხოლოდ ემოციური არ არის. ტირილის შემდეგ სხეულშიც ვგრძნობთ ცვლილებას — ღრმავდება სუნთქვა, ქრება დაძაბულობა და ფიზიკური სიმსუბუქეც მოდის. ამ ყველაფერს კი ბიოლოგიური მიზეზები აქვს და პირდაპირ უკავშირდება იმას, როგორ რეაგირებს ორგანიზმი დაგროვილ სტრესზე.

ფოტო: Pinterest

ხანდახან, თავადაც ვერ ვამჩნევთ, დღის განმავლობაში გაჩენილ პატარა დაძაბულობებს — უსიამოვნო დიალოგებს, გადადებული საქმეებსა და წარუმატებლობებს — ჩვენი სხეული როგორ იმახსოვრებს; გვეჭიმება მხრები, გვიძნელდება სუნთქვა და ყელში ბურთიც გვეჩხირება.

ამ მდგომარეობაში ცრემლები მხოლოდ ემოციას კი არ გამოხატავს, ფიზიკურ დაჭიმულობასაც ხსნის. ტირილის დროს სუნთქვა გვეცვლება — უფრო ღრმა და რიტმული ხდება. კუნთებიც მოდუნებას იწყებს, ნერვული სისტემა კი იმ რეჟიმში გადადის, რომელიც აღდგენაზეა პასუხისმგებელი. ამიტომაც არის, რომ ტირილის შემდეგ ღრმად ჩასუნთქვის სურვილი გვიჩნდება, ვეშვებით და ყელში დაჭიმულობაც ქრება. ეს სიმსუბუქე შემთხვევითი არ არის — ეს იმის ნიშანია, რომ ორგანიზმმა სიმძიმის ნაწილი გაუშვა. ცრემლის მეშვეობით სხეულიდან ოქსიტოცინი და ენდორფინები გამოიყოფა, რომლებიც ბუნებრივი ტკივილგამაყუჩებლებივით მოქმედებენ ჩვენზე.

ფოტო: Pinterest

ჯანსაღი ცხოვრების წესზე საუბრისას, ხშირად მხოლოდ სწორი კვება, ფიზიკური დატვირთვა და ძილი გვახსენდება. მაგრამ უნდა გვახსოვდეს, რომ სხეული და ფსიქიკა ერთმანეთისგან განცალკევებული არ არის — იმას, რასაც ვერ ვამბობთ და გამოვხატავთ, ხშირად სხეულში ვიგროვებთ. ეს კი ენერგიას ნელ-ნელა გვაცლის ისე, რომ მიზეზსაც კი ვერ ვამჩნევთ.

ამიტომ, შემდეგ ჯერზე, როცა ცრემლები მოგადგება, ნუ შეეცდები მათ შეკავებას. აუცილებლად მიეცი თავს ტირილის უფლება.