უკრაინამ მნიშვნელოვან პროგრესს მიაღწია დაზიანებული "დრუჟბის" ნავთობსადენის აღდგენის პროცესში და სარემონტო სამუშაოებს გაზაფხულზე დაასრულებს — განაცხადა უკრაინის პრეზიდენტმა ვოლოდიმირ ზელენსკიმ უნგრეთთან არსებული მწვავე დავის ფონზე, რომელიც რუსული ნავთობის მიწოდების შეფერხებას უკავშირდება. ინფორმაციას Reuters ავრცელებს.

უნგრეთსა და სლოვაკეთს იანვრის ბოლოდან რუსული ნავთობი მას შემდეგ არ მიეწოდებათ, რაც რუსულმა დრონმა დასავლეთ უკრაინაში მდებარე ნავთობსადენი დააზიანა.

უნგრეთისა და სლოვაკეთის მთავრობები კიევს რემონტის განზრახ გაჭიანურებაში ადანაშაულებენ. უკრაინა ამ ბრალდებას უარყოფს.

"ჩვენ დავასრულებთ სარემონტო სამუშაოებს, რადგან ასეთია შეთანხმება. მე მათ ვუთხარი, რომ ამას მიმდინარე წლის გაზაფხულზე დავასრულებდით... იქ უკვე ბევრი რამ გაკეთდა... რა თქმა უნდა, განადგურებული რეზერვუარების სწრაფად აღდგენა შეუძლებელია," — განაცხადა ზელენსკიმ ჟურნალისტებთან საუბრისას.

Reuters წერს, რომ ნავთობის ტრანზიტთან დაკავშირებულმა ამ დავამ უნგრეთი აიძულა, დაებლოკა ევროკავშირის მიერ უკრაინისთვის გამოყოფილი 90 მილიარდი ევროს ოდენობის სესხი იქამდე , სანამ "დრუჟბის" მეშვეობით ნაკადის მოძრაობა შეჩერებულია.