ევროვიზიის სცენაზე გამოსვლა აშშ-ში მოღვაწე ქართველი მომღერლის, ნინი ბრეგვაძის, გეგმებში რჩება. მუსიკოსმა, რომელსაც სასცენო სახელით Nini Iris იცნობენ, ცოტა ხნის წინ ახალი სინგლი I'M THE ONE ("მე ერთადერთი ვარ") გამოუშვა. რამდენიმე თვის წინ გამოვიდა ასევე მისი კიდევ ერთი სიმღერა U CAN'T CONTROL ME ("ვერ გამაკონტროლებ"). ორივე მათგანის ავტორი თავად ნინია და ალბათ სწორედ ამიტომ, სიმღერებს მის ხელწერად ქცეული ეპიკური ჟღერადობა და კიდევ უფრო დრამატული ტექსტი გამოარჩევს.

ტიკტოკზე უახლესი ვიდეოს კომენტარებში კი ქართველ მომღერალს ჰკითხეს, ისევ განიხილავდა თუ არა ევროვიზიის სიმღერის კონკურსზე მონაწილეობას. "მზად ვარ", — უპასუხა ნინიმ.

ფოტო: niniiris1 / TikTok

ნინის ევროვიზიაზე საქართველოს სახელით მონაწილეობა 2025 წელსაც სურდა. იგი კონკურსის ქართველი გულშემატკივრების მთავარ ფავორიტადაც მოიაზრებოდა. შარშან აპრილში გამოვიდა სიმღერა Release Me, რომელიც მუსიკოსს საზოგადოებრივი მაუწყებლისთვის ჰქონდა გაგზავნილი. საზმაუ ევროვიზიისთვის ქართველი კონკურსანტის შერჩევაზეა პასუხისმგებელი, მაგრამ მათი არჩევანი გასულ წელს მარიამ შენგელიაზე და სიმღერაზე Freedom შეჩერდა, რომელიც ნახევარფინალში ბოლოდან მეორე ადგილით გამოეთიშა კონკურსს.

Nini Iris მსოფლიო მასშტაბით 2023 წელს გაიცნეს, როცა მან ამერიკულ ვოისში მიიღო მონაწილეობა. "ბრმა ქასთინგზე" სიმღერის შესრულების შემდეგ, ნინის ოთხივე მწვრთნელი ოვაციებით შემოუტრიალდა. ირლანდიელმა პოპვარსკვლავმა ნაილ ჰორანმა, რომელიც ნინიმ მოგვიანებით თავის მენტორად აირჩია, ქართველ მუსიკოსს "პოტენციური გამარჯვებული" უწოდა. Nini Iris პროექტს ნახევარფინალიდან გამოეთიშა, მაგრამ მან ამერიკელი ტელემაყურებლის დიდი მხარდაჭერა დაიმსახურა.

ფოტო: NBC

ნინი ბრეგვაძე საქართველოდან ნიუ-იორკში საცხოვრებლად და მუსიკალური კარიერის გასაგრძელებლად 2016 წელს გადავიდა. მუსიკოსის თქმით, უცხო ქვეყანაში თავის დასამკვიდრებლად გრძელი და რთული გზა გაიარა.

მანამდე, 2015 წელს, 18 წლის მომღერალი ქართული X ფაქტორის მეორე სეზონში გამოჩნდა და კონკურსის ფინალისტიც გახდა. გამორჩეული ვოკალური შესაძლებლობების მქონე მუსიკოსმა, რომელიც, ამავდროულად, ცეკვავდა და რეპავდა, მეგაშოუს ჟიური და მაყურებელი ერთნაირად აღაფრთოვანა.

რაც შეეხება ევროვიზიას, სიმღერის კონკურსზე წელს ჩვენს ქვეყანას საბავშვო ევროფესტივალის პირველი ქართველი გამარჯვებულები, ბზიკები, წარადგენენ. საიუბილეო, რიგით 70-ე ევროფესტივალზე, რომელიც 12 მაისს აიღებს სტარტს, ჯგუფი გიგა კუხიანიძის საკონკურსო სიმღერას On Replay შეასრულებს.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...