აშშ-ის სახელმწიფო დეპარტამენტმა საქართველო იმ ქვეყნების სიას დაამატა, რომლის მოქალაქეებსაც გარკვეული ტიპის, მათ შორის სამოგზაურო, ვიზებისთვის $15 000-მდე სავიზო დეპოზიტის გადახდა მოუწევთ. ინფორმაციას აშშ-ის სახელმწიფო დეპარტამენტი ავრცელებს. აღნიშნული ცვლილება მიმდინარე წლის 2 აპრილიდან ამოქმედდება.

18 მარტს სახელმწიფო დეპარტამენტმა საქართველოს და კიდევ 11 ქვეყანას დააკისრა აღნიშნული სავიზო დეპოზიტის გადახდა. ეს ქვეყნებია: კამბოჯა, ეთიოპია, გრენადა, ლესოთო, მავრიკი, მონღოლეთი, მოზამბიკი, ნიკარაგუა, პაპუა-ახალი გვინეა, სეიშელები, ტუნისი.

ბოლო ცვლილებით, მაღალი რისკის ქვეყანათა რაოდენობა, რომლებზეც სავიზო დეპოზიტის პროგრამა ვრცელდება, 50-მდე გაიზარდა და მათ შორის საქართველო ერთადერთი ევროპული ქვეყანაა.

სახდეპი წერს, რომ ნებისმიერმა მოქალაქემ ან მოქალაქემ, რომელიც მოგზაურობს ამ ქვეყნებიდან ერთ-ერთის მიერ გაცემული პასპორტით და რომელსაც აქვს B1/B2 ვიზის მიღების უფლება, უნდა წარადგინოს 5 000, 10 000 ან 15 000 აშშ დოლარის ოდენობის დეპოზიტი. თანხა განისაზღვრება ვიზასთან დაკავშირებული გასაუბრების დროს. განმცხადებელმა ასევე უნდა წარადგინოს შინაგანი უსაფრთხოების დეპარტამენტის I-352 ფორმა.

სახდეპის ვებგვერდზე გამოქვეყნებულ ინფორმაციაში ასევე აღნიშნულია, რომ დეპოზიტი არ იძლევა ვიზის გაცემის გარანტიას. თანხა აპლიკანტებს იმ შემთხვევაში დაუბრუნდებათ, თუ სამშობლოში ვიზის პერიოდისა და დეპოზიტის პირობების შესაბამისად დაბრუნდებიან ან საერთოდ არ იმოგზაურებენ.

სავიზო გასაუბრების შემდეგ, საქართველოს მოქალაქეებმა სავიზო დეპოზიტი 30 დღის განმავლობაში უნდა გადაიხადონ, რის შემდეგაც მიიღებენ აშშ-ში ერთჯერადად შესვლის ვიზას 3 თვემდე ვადით.