პარტია გირჩი — მეტი თავისუფლების ერთ-ერთი ლიდერი, ზურა ჯაფარიძე სოციალურ ქსელში პლასტმასის ბოთლების აკრძალვას გამოეხმაურა. მისი განმარტებით, მსგავსი რეგულაცია სხვა ქვეყნებში არ არსებობს და ეს აკრძალვა ნიშნავს გაზრდილ წარმოების ხარჯებს, გაზრდილ ლოჯისტიკურ ხარჯებს, და საბოლოო ჯამში გაზრდილ ფასს საბოლოო პროდუქტებზე.

მისივე განმარტებით, "ეს იქნება სიგნალი ყველა პოტენციური ინვესტორისთვის, რომ აქ ეკონომიკური თამაშის წესები შეიძლება ნებისმიერ დროს შეიცვალოს სრულიად უაზროდ და, შეასაბამისად, ამ ქვეყანაში ფულის ჩადება რისკია". ზურა ჯაფარიძემ ასევე დაწერა, რომ ამ აკრძალვის მიზეზის ზუსტად დადგენა რთულია, თუმცა " გარემო რომ არაფერ შუაშია, ცხადია."

"ამ 20 ლიტრიან პლასტიკის ბოთლებზე კი გავერთეთ, მაგრამ 2 სიტყვა სერიოზულადაც რომ ვთქვათ:

— მსგავსი რეგულაცია არ არსებობს არსად, არცერთ ქვეყანაში. ამასთან მიახლოებულიც კი არ არსებობს არსად, მათ შორის არც ჩვენზე ბევრად მდიდარ და ეკოლოგიაზე უაღრესად ზედმიწევნით მზრუნავ ქვეყნებში;

— თუ ეს აკრძალვა შევიდა ძალაში (არ წაიღეს უკან), მწარმოებლებს რომლებიც ახლა იყენებენ PET-ს (პლასტიკს), მოუწევთ შუშაზე გადასვლა. მაგრამ შუშა ა) ძვირია, ბ) მსხვრევადია გ) მისი ტრანსპორტირება ძვირია. ეს ნიშნავს გაზრდილ წარმოების ხარჯებს, გაზრდილ ლოჯისტიკურ ხარჯებს, და საბოლოო ჯამში გაზრდილ ფასს საბოლოო პროდუქტებზე;

— მსხვილ მწარმოებლებს (ბორჯომი, კოკა-კოლა, ნაბეღლავი და სხვა) ათობით მილიონი აქვთ დახარჯული PET-ზე დაფუძნებულ საწარმოო ხაზებში. ახლა ეს ხაზები ან უნდა ჩანაცვლდეს სხვა ხაზებით (რაც დამატებით ინვესტიციას მოითხოვს, მათ შორის იმის გათვალისწინებით რომ შუშის ბოთლებზე დაფუძნებული საწარმოო ხაზი შედარებით ნელია) ან უბრალოდ გამოუსადეგარი ხდება ადგილობრივი ბაზრისთვის;

— ეს იქნება სიგნალი ყველა პოტენციური ინვესტორისთვის (რომლებიც ისედაც აღარ გვყავს) რომ აქ ეკონომიკური თამაშის წესები შეიძლება ნებისმიერ დროს შეიცვალოს სრულიად უაზროდ და, შეასაბამისად, ამ ქვეყანაში ფულის ჩადება რისკია.

რატომ შეიძლება აკეთებდნენ ამას, 100%-იანი სიზუსტით თქმა რთულია. გარემო რომ არაფერ შუაშია, ცხადია. ან ვიღაცას/ვიღაცეებს სჯიან/აშინებენ/გაწეწვას უპირებენ ან ვიღაცის პინგვინმა პლასტმასის თავსახური გადაყლაპა და ეს სიგიჟე მისი მორიგი დილის ხუშტურია", — დაწერა ზურა ჯაფარიძემ სოციალურ ქსელში.

შეგახსენებთ, მთავრობის დადგენილებით, 2026 წლის 1 ივლისიდან აიკრძალება საზოგადოებრივი კვების ობიექტების მიერ მომხმარებლისთვის პლასტმასის ბოთლებით სასმელის მიწოდება, ხოლო 2027 წლის 1 თებერვლიდან — პლასტმასის ბოთლებში სასმელების წარმოება (გარდა ექსპორტის მიზნით), იმპორტი და ბაზარზე განთავსება.

აკრძალვა არ ვრცელდება 3 ლიტრი და მეტი მოცულობის სასმელ წყალზე, ასევე 20 ლიტრი და მეტი მოცულობის გაზირებულ სასმელებზე.