ბიზნესასოციაციის ვიცე-პრეზიდენტმა, ლაშა პაპაშვილმა BMG-თან საუბრისას განაცხადა, რომ "მსოფლიოში პრეცედენტი არ არსებობს" პლასტმასის ბოთლების აკრძალვის და "ეშინია, ფასები არ გაიქცეს".

"მე პირდაპირ არა მაქვს შეხება ამაში, მე როგორც ვიცი რძის პროდუქტებზე არ აკეთებენ, აქცენტი კეთდება მხოლოდ მინერალურ და ჩვეულებრივი წყლის ჩამოსხმაზე და 1 ლიტრამდე იქნება ეს შეზღუდვა, მე როგორც ვიცი. ღრმად არ ვიცი ეს თემა, თუმცა პირადად ვფიქრობ, კარგია შუშაზე თუ გადავა, პირადად მე ვცდილობ ყოველთვის, რომ შუშა ვიხმარო მაგრამ, რამდენად მოხერხდება.

ფასებზე რა თქმა უნდა პირდაპირ აისახება, ფასი მოემატება ამ შემთხვევაში. თუმცა ზოგიერთი ქვეყნის მაგალითზე დეგრადირებადი ანუ მწვანე, ასე ვთქვათ, უფრო ადვილად გადასამუშავებელი თუ ორგანულად გადასამუშავებელი პეტი დაიშვას, როგორც ვთქვათ საფრანგეთშია.

მე არ ვიცი... ასეთი პრეცედენტი არ არის მსოფლიოში და ჩვენ მხოლოდ იმიტომ რომ რაღაც ექსპერიმენტი გავაკეთოთ და რადგან პატარა ქვეყანა ვართ გავრისკოთ, არ ვიცი, ზუსტად ვერ გეტყვით... ცოტა 50/50-ზე ვარ ამ წუთს, მინდა, ჯანმრთელი [პროდუქტი] იყოს, თან მეშინია, ფასები არ გაიქცეს," — თქვა საქართველოს ბიზნეს ასოციაციის ვიცე-პრეზიდენტმა, ლაშა პაპაშვილმა BMG-თან საუბრისას.

მთავრობის დადგენილებით, 2026 წლის 1 ივლისიდან აიკრძალება საზოგადოებრივი კვების ობიექტების მიერ მომხმარებლისთვის პლასტმასის ბოთლებით სასმელის მიწოდება, ხოლო 2027 წლის 1 თებერვლიდან — პლასტმასის ბოთლებში სასმელების წარმოება (გარდა ექსპორტის მიზნით), იმპორტი და ბაზარზე განთავსება.

აკრძალვა არ ვრცელდება 3 ლიტრი და მეტი მოცულობის სასმელ წყალზე, ასევე 20 ლიტრი და მეტი მოცულობის გაზირებულ სასმელებზე.