ირაკლი კობახიძის შეფასებით, ეუთოს წევრი 24 ქვეყნის მიერ მოსკოვის მექანიზმის ფარგლებში გამოქვეყნებულ ანგარიში "სიცრუითაა გაჯერებული" და "დასკვნა წინასწარ იყო დაწერილი". კობახიძემ ასევე დასძინა, რომ დასკვნაში მოცემულ იმ რეკომენდაციებს გაითვალისწინებენ, "რომელიც სიმართლეს შეესაბამება".

"ეს იყო პირდაპირ ინტერესთა კონფლიქტი. ის ფაქტი, რომ ინტერესთა კონფლიქტი დამალა ამ კონკრეტულმა ადამიანმა, ეჭვებს აღრმავებს. ყველამ ვიცით, რომ წინასწარ იყო დაწერილი ის დასკვნა, რომელიც მოგვიანებით გამოქვეყნდა. საბოლოო ჯამში, ყველა ვხედავთ, რომ თავიდან ბოლომდე სიცრუით არის გაჯერებული ეს დასკვნა, რაზეც საზოგადოებას კიდევ უფრო ფართოდ წარვუდგენთ ინფორმაციას. ჩვენ, პირველ რიგში, ვამხელთ ყველა იმ სიცრუეს, რომელიც არის ასახული ამ დასკვნაში, ასევე მინდა, აღვნიშნო, რომ ამ დასკვნაში არის წარმოდგენილი კონკრეტული ინფორმაცია და რეკომენდაციები, რომლებიც შეესაბამება სინამდვილეს და რომელთა გათვალისწინებაც არის აუცილებელი. ასეთი ჩანაწერებიც არის ამ დასკვნაში. ამაზე დეტალურ ინფორმაციას წარვუდგენთ საზოგადოებას. ჩვენ ალბათ სპეციალურ ბრიფინგსაც მივუძღვნით ამ საკითხს გამომდინარე იქიდან, რომ მნიშვნელოვანი საზოგადოებისთვის ინფორმაციის ქონა ამ საკითხზე. არის საკითხები, რაზეც ჩვენ გვჭირდება ყურადღების გამახვილება, თუმცა მთლიანობაში ეს დასკვნა არის სიცრუით გაჯერებული.

მთლიანად პოლიტიკურია საფუძველი, სარჩული ამ პროცესების უკან. იცით, რომელი ქვეყნები იყვნენ თავში ამ პროცესის ინიციატორები, შემდეგ როგორ გაგრძელდა ეს პროცესები. თავიდან ბოლომდე არის ვიწრო პოლიტიკური ინტერესებით ნაკარნახევი ის პროცესი, რომელიც წამოიწყეს. საქართველოზე მეტად არადემოკრატიული ქვეყანა ვერ ნახეს ეუთოს მასშტაბით," — განაცხადა ირაკლი კობახიძემ.

კობახიძემ ასევე დასძინა, რომ ანგარიშში მოყვანილი არაადამიანური მოპყრობის მაგალითები "სიცრუეა და წამებას ადგილი არ ჰქონია. შემდეგ კობახიძემ დასძინა, რომ მხოლოდ 4 ძალადობრივი ინციდენტი არსებობს და დამნაშავეების დასჯა იმიტომ ვერ მოხერხდა, რომ "მათი იდენტიფიცირება ვერ შეძლეს".

"რაც შეეხება წამებას, წამება თვითონ არის სიცრუე. რაც შეეხება ძალადობრივ ინციდენტებს, გადაცდომებს, მათ შორის სავარაუდოდ დანაშაულებრივ გადაცდომებს, აქ პრაქტიკული პრობლემები იყო, რის გამოც კონკრეტული დამნაშავეების დასჯა ვერ მოხერხდა.

იყო ოთხი მძიმე გადაცდომა. სამწუხაროდ, ვერცერთ შემთხვევაში იდენტიფიცირება ჯერ ვერ მოხერხდა. როგავა, ხაბეიშვილი, ერთი ახალგაზრდა და მეოთხე შემთხვევა იყო ლეონიძის შემთხვევა, სადაც პოლიციელებთან არ გვქონდა ჩვენ საქმე. ძალადობა განხორციელდა არაძალოვანი სტრუქტურების წარმომადგენლების მხრიდან... მაღალი სტანდარტია. თქვენი, ოპოზიციის, მხრიდან ძალადობდა 500-ზე მეტი ადამიანი, აქედან მხოლოდ 30 პირი მიეცა პასუხისგებაში," — განაცხადა კობახიძემ.

შეგახსენებთ, 2026 წლის 12 მარტს ეუთოს მოსკოვის მექანიზმის უკიდურესად კრიტიკული ანგარიში გამოქვეყნდა, რომელიც საქართველოში 2024 წლის გაზაფხულიდან დღემდე ადამიანის უფლებებისა და ძირითადი თავისუფლებების კუთხით არსებულ ვითარებას შეეხება, — წერს საია მოსკოვის მექანიზმის ანგარიშის მიმოხილისას და დასძენს, რომ "ანგარიში კიდევ ერთხელ ადასტურებს ადამიანის უფლებების სრულ უგულებელყოფას, სისტემური და ფართომასშტაბიანი დარღვევების პრაქტიკას, ავტორიტარული მმართველობის გაძლიერებასთან დაკავშირებულ მოვლენებსა და ტენდენციებს, რომლებზეც, უკვე წლებია, უფლებადამცველები და საერთაშორისო მექანიზმები მიუთითებენ".