ნედლი ხორცის ნაცვლად — გაყინული ხორცი ან გაურკვეველი შემადგენლობის იაფფასიანი სოსისი; კარაქის ნაცვლად — მცენარეული სპრედი ან ზეთი, ხაჭაპურში ნაპოვნი ხოჭო, პაშტეტში — მატლები, დაობებული სოსისი და უვარგისი ხილ-ბოსტნეული — "რადიო თავისუფლება", როგორც თავად წერენ, პენიტენციური სამსახურის მიერ 4 წლის განმავლობაში დამალულ დოკუმენტებს აქვეყნებს, სადაც პატიმართა კვების სისტემატური და უხეში დარღვევებია აღწერილი.

მათი ცნობით, ერთი პატიმრის კვებაზე დღეში 8.93 ლარი გამოიყოფა, თანამშრომლებზე კი — 12-დან 26.4 ლარამდე. მათივე ინფორმაციით, ტუბერკულოზით, დიაბეტითა და C ჰეპატიტით დაავადებულებს ხშირად აკლებდნენ დიეტურ ულუფებს (ხაჭო, მაწონი, ხორცი).

პენიტენციურ სისტემას 2019 წლიდან ამარაგებს "ილი ჯგუფი", რომლის დამფუძნებლები მმართველი პარტიის შემწირველები არიან. მიუხედავად იმისა, რომ ინსპექტირების კომისიამ 2019 წლიდანვე იცოდა დარღვევების შესახებ, სახელმწიფო კონტრაქტებს მაინც ამ კომპანიას უფორმებდა. 2019 წელს 73-მილიონიანი, ხოლო 2023 წელს 103-მილიონიანი ხელშეკრულება გაფორმდა და ჯამში კომპანიამ 180 მლნ ლარზე მეტი მიიღო.

პენიტენციურმა სამსახურმა კომპანიას ჯამში 37 მილიონი ლარის ჯარიმა დააკისრა, თუმცა აქედან ბიუჯეტში მხოლოდ 5 მილიონამდეა გადახდილი. ცნობილია ისიც, რომ კომპანია ჯარიმებს სასამართლოში ასაჩივრებს (მიმდინარეობს 15 დავა) და როცა უწყებამ ჯარიმების ჩამოჭრა დააპირა, კომპანია გაკოტრებითა და მომსახურების შეწყვეტით დაიმუქრა, რის შემდეგაც სახელმწიფომ სანქციების აღსრულება შეაჩერა.

როგორც "რადიო თავისუფლება" წერს, 2025 წლის ნოემბერში იუსტიციის სამინისტრომ პროსამთავრობო ტელეკომპანია "იმედს" მე-8 საპატიმროში "სანიმუშო კვების" შესახებ რეპორტაჟი მოამზადებინა, რაც რეალურ დოკუმენტებს ეწინააღმდეგებოდა.

ამჟამად "ილი ჯგუფს" ხელშეკრულება 2026 წლის 31 მარტამდე გაუგრძელდა და ის კვლავ განაგრძობს 11 000-ზე მეტი პატიმრის მომარაგებას.