პარტია "ხალხისთვის" ოპოზიციურ ალიანსს არ შეუერთდა. როგორც პარტიის ლიდერი ანა დოლიძე სოციალურ ქსელში წერს, ის "იმ უმრავლესობასთან ერთადა, რომელიც საკუთარ თავს ხედავს "ნაციონალური მოძრაობის" მიღმა".

"მიხარია, თუ ვინმე დღევანდელი შეხვედრის კადრებში საკუთარი შეხედულებების წარმომადგენლებს დაინახავს. თუმცა სინამდვილეში ახალი არაფერია: ნაციონალური მოძრაობის ძველი თანამოაზრეები და თანაგუნდელები ერთად დასხდნენ. ეს ძალიანაც კარგია, ამომრჩეველს ნაკლებად დააბნევს და დროს ნაკლებად დააკარგვინებს. თუმცა, დღევანდელი შემადგენლობა წარმოადგენს მოსახლეობის პოლიტიკური გემოვნების 20-25%. მე ვარ იმ უმრავლესობასთან ერთად, რომელიც საკუთარ თავს ხედავს ნაციონალური მოძრაობის მიღმა", — წერს ანა დოლიძე.

ცნობისათვის, გუშინ ოპოზიციური პარტიების ალიანსი შედგა, რომელშიც გაერთიანებულია 9 პარტია: ახალი, გირჩი — მეტი თავისუფლება, დროა, ევროპული საქართველო, ეროვნულ-დემოკრატიული პარტია, ერთიანი ნაციონალური მოძრაობა, თავისუფლების მოედანი, სტრატეგია აღმაშენებელი და ფედერალისტები. ამ ალიანსს ასევე არ შეუერთდნენ: ლელო ძლიერი საქართველო და გახარია საქართველოსთვის.