კოალიცია ცვლილებებისთვის ერთ-ერთი წევრის, გელა ხასაიას ადვოკატის, ომარ ფურცელაძის განცხადებით, საქმეში არსებული ვიდეომტკიცებულებებით დასტურდება, რომ ე.წ დაზარალებული შემთხვევიდან რამდენიმე წუთში "მოტეხილი ხელით" 20 კილოგრამიან სკუტერს მოათრევს, ხოლო გელა ხასაია შემთხვევიდან 6 წუთის შემდეგ ადგილზე რადიკალურად განსხვავებული მიმართულებით გაივლისს. დაზარალებული ხასაიას "თავდასხმის შედეგად ხელის მოტეხვაში" სდებს ბრალს.

"ბრალდების მტკიცებით, მან სხვა პირთან ერთად ხელი მოტეხა დაზარალებულს ჩხუბისას.

მორიგი სასამართლო სხდომის ფარგლებში, 19 თებერვალს, გამოვიკვლიეთ ვიდეომტკიცებულებები. რეალურად, ერთადერთი ობიექტური მტკიცებულება საქმეში:

1. დადასტურდა, რომ ე.წ დაზარალებული, შემთხვევიდან რამდენიმე წუთში “მოტეხილი ხელით” მიათრევს საორიენტაციოდ 20 კილოგრამიან სკუტერს და დროგამოშვებით იმავე ხელით უპრობლემოდ იყენებს მობილურ ტელეფონს;

2. გელა ხასაია შემთხვევის ადგილზე ფიქსირდება შემთხვევამდე 27 წუთით ადრე და მოგვიანებით, შემთხვევიდან 6 წუთის შემდეგ შემთხვევის ადგილის მიმდებარედ გაივლის რადიკალურად განსხვავებული მიმართულებიდან მომავალი;

3. დადასტურდა, რომ სხვა მოწმეების მიერ გამოძიებაში მიცემული ჩვენებები ტყუილია და ეწინააღმდეგება ვიდეომტკიცებულებებს.

საქმეში კვლავ არ არსებობს სამედიცინო დასკვნა, რომ დაზარალებულს ჯანმრთელობის დაზიანება მიადგა.

ჩვენ ვაგრძელებთ გელა ხასაიას დაცვას სასამართლოში, თუმცა, შეუძლებელია ამ მასშტაბის უსამართლობაზე რეაქციისგან თავის შეკავება ნებისმიერ ფორმატში," — წერს ომარ ფურცელაძე.

24 დეკემბერს, ადვოკატმა ომარ ფურცელაძემ განაცხადა, რომ იმ თავდასხმის ამსახველ ვიდეოჩანაწერებზე, რომელზეც ოპოზიციონერ აქტივისტს ედავებიან — უწყებამ შემთხვევის ამსახველი ვიდეოჩანაწერები გაანადგურა, რითაც ხასაიას უდანაშაულობა დადგინდებოდა. ფურცელაძემ ასევე დასძინა, რომ საქმეზე დაკითხული ორი მოწმის ჩვენება ერთმანეთს გამორიცხავს.

ცნობისთვის, გელა ხასაია 29 სექტემბერს, გვიან ღამით დააკავეს. სასამართლო გელა ხასაიას და ვასილ ქერდიყოშვილს ჯგუფურ ძალადობას ედავება. პროკურატურის განმარტებით, ხასაიამ და ქერდიყოშვილმა ვაგზლის მოედნის მიმდებარე ტერიტორიაზე, რამაზ ჩადუნელს ჯანმრთელობის დაზიანება მიაყენეს — მიუხედავად ჯგუფური ძალადობის მუხლისა, ბრალდებულები აცხადებენ, რომ ერთმანეთს არ იცნობენ. 3 დეკემბერს, ვასილ ქერდიყოშვილმა ბრალი აღიარა და პროკურატურასთან საპროცესო შეთანხმებაზე მუშაობს.

გელა ხასაია დღემდე არ აღიარებს ბრალს, მას 4-დან 6 წლამდე თავისუფლების აღკვეთას ემუქრება.