ოცნების პარლამენტის იურიდიული კომიტეტის თავმჯდომარის, არჩილ გორდულაძეს განცხადებით, "დიფ სთეითის" წარმომადგენლების "ინტერესია" კონკრეტული სისხლის სამართლის საქმეები პოლიტიკურად წარმოაჩინონ.

გორდულაძის თქმით, "ყველა ცრუობდა", ვინც "თანაინვესტირების ფონდის" ყოფილ ხელმძღვანელს გიორგი ბაჩიაშვილს პოლიტპატიმარს უწოდებდა და დასძინა, რომ BBC-იმ დოკუმენტურ ფილმში ბაჩიაშვილის ამ "ლაიტმოტივად" მოხსენიებაც მიანიშნებს, რომ ისინი "ცრუობდნენ".

"დიფ სთეითის“ წარმომადგენლებს თუ მათ მართულ ადამიანებს, ყოველთვის აქვთ სურვილი, რომ კონკრეტული სისხლის სამართლის საქმეები წარმოაჩინონ როგორც პოლიტიკური საქმეები და შემდეგ ეს თავიანთი შავბნელი მიზნებისთვის გამოიყენონ, რასაც, მათ შორის, ჩვენს ქვეყანაში ყველაფერზე ხელმომწერი აგენტურის წარმომადგენლებიც ცდილობენ. ზუსტად ეს არის, რომ როდესაც ერთი კონკრეტული სისხლის სამართლის საქმეზე ასეთი ამბავი ატეხეს, საბოლოო ჯამში დარჩა ისევ და ისევ იმად რაც იყო — ეს არის ერთი კონკრეტულის სისხლის სამართლის საქმე. ყველა იტყუებოდა, ყველა ცრუობდა, როდესაც ბაჩიაშვილს პოლიტიკურ პატიმარს უწოდებდა, მათ შორის, BBC-ის წარმომადგენლებიც ცრუობდნენ იმ ავადსახსენებელ ფილმში, სადაც ბაჩიაშვილის სახელსა და გვარს ლაიტმოტივად გასდევდა როგორც პოლიტიკური პატიმარი. ეს ხაზს უსვამს, რომ BBC-ის ფილმი სრული დეზინფორმაციით არის აღსავსე და მხოლოდ და მხოლოდ ჩვენს ქვეყანაზე თავდასხმის ერთ-ერთ საფუძვლად იქნა გამოყენებული შემდეგში," — განაცხადა გორდულაძემ. (წყარო IPN)

შეგახსენებთ, 18 თებერვალს, "თანაინვესტირების ფონდის“ ყოფილმა ხელმძღვანელმა, გიორგი ბაჩიაშვილმა გლდანის ციხე დატოვა. პროკურატურის განცხადებით, ბაჩიაშვილმა "სრულად აღიარა დანაშაული და სრულად ითანამშრომლა გამოძიებასთან — აანაზღაურა ზიანი, რისთვისაც გაუფორმდა საპროცესო შეთანხმება ჯარიმასა და პირობით მსჯავრზე."

გიორგი ბაჩიაშვილს 11 წლით პატიმრობა ჰქონდა მისჯილი. მას დიდი ოდენობით თანხის მითვისებას და უკანონო შემოსავლის ლეგალიზაციას ედავებოდნენ. თანხის მითვისების ნაწილში მას 10 წლით თავისუფლების აღკვეთა ჰქონდა მისჯილი, ხოლო უკანონო შემოსავლის ლეგალიზაციაში – 11 წლით, რაც საბოლოო სასჯელად დარჩა. ამას გარდა, ბაჩიაშვილს პატიმრობა ჰქონდა შეფარდებული საზღვრის უკანონო კვეთის საქმეზეც.