სამხრეთ კორეის სასამართლომ ყოფილ პრეზიდენტ იუნ სოკ იოლს, 2024 წელს საომარი მდგომარეობის გამოცხადების წარუმატებელი მცდელობის გამო, სამუდამო პატიმრობა მიუსაჯა. ამის შესახებ ინფორმაციას სამხრეთკორეული მედია ავრცელებს.

სეულის ცენტრალურმა საოლქო სასამართლომ, საქმის პირველივე განხილვისას, იუნი საომარი მდგომარეობის გამოცხადების გზით ამბოხების მოწყობაში ცნო დამნაშავედ. თუმცა, სასამართლომ მას უფრო მსუბუქი სასჯელი შეუფარდა, ვიდრე სპეციალური პროკურორების მიერ მოთხოვნილი სიკვდილით დასჯა იყო.

სასამართლომ განმარტა, რომ საომარი მდგომარეობის გამოცხადება ამბოხებას უტოლდებოდა, რადგან ყოფილი პრეზიდენტი საპარლამენტო კომპლექსში ჯარების გაგზავნით ეროვნული ასამბლეის პარალიზებას ცდილობდა.

მოსამართლემ არაერთხელ გაუსვა ხაზი, რომ საქმის მთავარ არსს სწორედ იუნის მიერ ეროვნულ ასამბლეაში სამხედრო ძალების განლაგება წარმოადგენდა.

სასამართლო სხდომას თავად პატიმრობაში მყოფი ყოფილი პრეზიდენტი ესწრებოდა და მისი ტრანსლაცია პირდაპირ ეთერში, ტელევიზიით გადაიცემოდა.