2026 წლის 3-4 მარტს, თბილისი ისტორიულ მოვლენას, მსოფლიო მუსიკოსთა ფედერაციის (FIM) ევროპულ კრებას უმასპინძლებს.

მსოფლიო მუსიკოსთა ფედერაციის (FIM) ევროპული ჯგუფის მასშტაბური შეკრება საქართველოში ჩატარდება, ხოლო ღონისძიებას საქართველოს მუსიკოსთა პროფესიული კავშირი (სმპკ/TUMIG) უმასპინძლებს.

"ჩვენთვის დიდი პატივია ამ მასშტაბის ღონისძიების მასპინძლობა. ეს არის არა მხოლოდ პროფესიული აღიარება, არამედ კიდევ ერთი ნაბიჯი, რომელიც ამტკიცებს, რომ საქართველო ევროპაა", — ამბობს საქართველოს მუსიკოსთა პროფესიული კავშირი.

საერთაშორისო ფორუმი, რომელიც სასტუმრო ტელეგრაფში გაიმართება, თავს მოუყრის ევროპის სხვადასხვა ქვეყნის მუსიკალური კავშირების თავმჯდომარეებსა და ამ სფეროს წარმომადგენლებს. ორდღიანი სამუშაო შეხვედრის ფარგლებში, დელეგატები განიხილავენ ევროპული მუსიკალური ინდუსტრიის სტრატეგიულ გეგმებს, პროფესიულ გამოწვევებსა და თანამშრომლობის ახალ შესაძლებლობებს.

"თბილისი ხდება ადგილი, სადაც ევროპული მუსიკის მომავალი და სამომავლო გეგმები განისაზღვრება", — განაცხადა საქართველოს მუსიკოსთა პროფესიულმა კავშირმა.

აღსანიშნავია, რომ მსგავსი მასშტაბის მოვლენა საქართველოში აქამდე არასდროს მომხდარა. როგორც საქართველოს მუსიკოსთა პროფესიულ კავშირში ამბობენ, ის ფაქტი, რომ მსოფლიო ფედერაციამ ევროპული ჯგუფის შეკრების ადგილად თბილისი აირჩია, ხაზს უსვამს საქართველოს მზარდ როლს საერთაშორისო მუსიკალურ რუკაზე.

საქართველოს მუსიკოსთა პროფესიული კავშირის საინფორმაციო მხარდამჭერია On.ge