თსუ-ს რექტორი ჯაბა სამუშია აცხადებს, რომ "ერთი ქალაქი — ერთი უნივერსიტეტის" რეფორმის დედააზრი "თბილისის სახელმწიფო უნივერსიტეტი ფუნდამენტური კვლევების განვითარების ერთ-ერთ მთავარ ცენტრად ჩამოყალიბებაა". მის კომენტარს პროსამთავრობო ტელეკომპანია "რუსთავი 2" ავრცელებს.

სამუშიას თქმით, რეფორმის მიუხედავად, თსუ-ში მისაღები სტუდენტების რაოდენობა არ მცირდება.

"განათლების რეფორმის ფარგლებში თბილისის სახელმწიფო უნივერსიტეტში ხდება იმ მიმართულების ხელშეწყობა, რომელსაც ესოდენ დიდი ისტორია აქვს საქართველოში.

თბილისის სახელმწიფო უნივერსიტეტი უნდა ჩამოყალიბდეს ფუნდამენტური კვლევების განვითარების ერთ-ერთ მთავარ ცენტრად, ეს არის რეფორმის დედააზრი. ამ მიმართულებით იგეგმება ახალი ლაბორატორიების, ახალი სამეცნიერო კვლევითი პროექტების განხორციელება, რათა თსუ რეგიონსა და ევროპაში კონკურენტუნარიან საგანმანათლებლო დაწესებულებად იქცეს.

შრომით ბაზართან ორიენტირება ძალიან მნიშვნელოვანია, რათა უნივერსიტეტდამთავრებულს ორიენტაცია ჰქონდეს, რომ დასაქმდეს. უნივერსიტეტში სწავლება და შემდგომ უკვე დასაქმება გადაჯაჭვულია ერთმანეთთან და ძალიან საშურია, რომ შრომის ბაზართან ამ საკითხის დაახლოება მოხდა. ცალკე მინდა, გამოვყო სტუდენტთა კვოტირების თემა. ვფიქრობთ, რომ მას მოგვიანებით დავუბრუნდებით. ამ ეტაპზე ერთი რამ შემიძლია ვთქვა — თბილისის სახელმწიფო უნივერსიტეტში მისაღები სტუდენტების რაოდენობა არ მცირდება," — თქვა სამუშიამ.

ქართული ოცნების განათლების სამინისტრო სახელმწიფო უნივერსიტეტებში ფაკულტეტების კვოტები გამოაქვეყნა. ფაკულტეტები სახელმწიფო უნივერსიტეტებში ასე განაწილდა:

  • რომელ უნივერსიტეტში რომელი ფაკულტეტი დარჩება? — გივი მიქანაძის განმარტება

    "თბილისის სახელმწიფო უნივერსიტეტი სტუდენტებს მიიღებს ისეთ მიმართულებებზე, როგორიცაა ზუსტი და საბუნებისმეტყველო მეცნიერებები; ჰუმანიტარული მეცნიერებები, პედაგოგიკის გამოკლებით; სამართალი; ეკონომიკა და ბიზნესის ადმინისტრირება; სოციალური და პოლიტიკური მეცნიერებები.

    საქართველოს ტექნიკურ უნივერსიტეტში მიღება გამოცხადდება საინჟინრო-ტექნიკურ დისციპლინებზე.

    თბილისის სახელმწიფო სამედიცინო უნივერსიტეტში — მედიცინის სპეციალობებზე.
    ილიას სახელმწიფო უნივერსიტეტში — პედაგოგიკის პროგრამებსა და ABET აკრედიტაციის მქონე STEM სპეციალობებზე.

    სოხუმის სახელმწიფო უნივერსიტეტში — აგრარულ სპეციალობებზე, ქართულ-აფხაზური ენის და ლიტერატურისა და პედაგოგიკის სპეციალობებზე.
    სახელოვნებო უნივერსიტეტები და სპორტის უნივერსიტეტი სტუდენტებს მიიღებენ შესაბამის სპეციალობებზე.

    ბათუმისა და ქუთაისის უნივერსიტეტები შეინარჩუნებენ მრავალფუნქციურ დატვირთვას.