მორიგი სამარცხვინო გადაწყვეტილება განათლების სფეროში, — ასე გამოეხმაურა ილიაუნის პროფესორი გიგა ზედანია სახელმწიფო უნივერსიტეტებში ფაკულტეტების კვოტირებას. მისი თქმით, ქართულმა ოცნებამ "კეთილი ინებოს და წარმოადგინოს ბაზრის კვლევა, სადაც წერია, რამდენი ფილოსოფოსი, მენეჯერი, ინჟინერი და ბიოლოგი სჭირდება ქვეყანას".

"მორიგი სამარცხვინო გადაწყვეტილება განათლების სფეროში — როცა გვეგონა, რომ ფსკერს მივაღწიეთ, ქვემოდან დააკაკუნეს.

ისე, კეთილი ინებონ და წარმოადგინონ ბაზრის კვლევა, სადაც წერია, რამდენი ფილოსოფოსი, მენეჯერი, ინჟინერი და ბიოლოგი სჭირდება ქვეყანას. ცოტას მაინც გავიცინებთ ამ მოჟამულ-მოშხამულ ატმოსფეროში", — ილიაუნის პროფესორი გიგა ზედანია საჯარო უნივერსიტეტებში ფაკულტეტების კვოტირებას სოციალურ ქსელში ეხმაურება.

ქართული ოცნების განათლების სამინისტრო სახელმწიფო უნივერსიტეტებში ფაკულტეტების კვოტების შესახებ ინფორმაცია დღეს გამოაქვეყნა. ფაკულტეტები სახელმწიფო უნივერსიტეტებში ასე განაწილდა:

"თბილისის სახელმწიფო უნივერსიტეტი სტუდენტებს მიიღებს ისეთ მიმართულებებზე, როგორიცაა ზუსტი და საბუნებისმეტყველო მეცნიერებები; ჰუმანიტარული მეცნიერებები, პედაგოგიკის გამოკლებით; სამართალი; ეკონომიკა და ბიზნესის ადმინისტრირება; სოციალური და პოლიტიკური მეცნიერებები.

საქართველოს ტექნიკურ უნივერსიტეტში მიღება გამოცხადდება საინჟინრო-ტექნიკურ დისციპლინებზე.

თბილისის სახელმწიფო სამედიცინო უნივერსიტეტში — მედიცინის სპეციალობებზე.

ილიას სახელმწიფო უნივერსიტეტში — პედაგოგიკის პროგრამებსა და ABET აკრედიტაციის მქონე STEM სპეციალობებზე.

სოხუმის სახელმწიფო უნივერსიტეტში — აგრარულ სპეციალობებზე, ქართულ-აფხაზური ენის და ლიტერატურისა და პედაგოგიკის სპეციალობებზე.

სახელოვნებო უნივერსიტეტები და სპორტის უნივერსიტეტი სტუდენტებს მიიღებენ შესაბამის სპეციალობებზე.

ბათუმისა და ქუთაისის უნივერსიტეტები შეინარჩუნებენ მრავალფუნქციურ დატვირთვას.

ზუგდიდის, გორის, ახალციხისა და თელავის უნივერსიტეტებში აქცენტი გაკეთდება აგრარულ სპეციალობებზე, ტურიზმის მიმართულებასა და პედაგოგიკაზე.