ჩრდილოეთ კორეა ბირთვული იარაღის სრულ აკრძალვას მხარს უჭერს, ამის შესახებ გაეროში ჩრდილოეთ კორეის მუდმივმა წარმომადგენელმა კიმ ინ რენმა განაცხადა.

გენერალური ასამბლეის განიარაღების კომიტეტში გამოსვლისას დიპლომატმა განაცხადა, რომ ბირთვული იარაღის სრული აკრძალვის შესახებ მიღებულ კონვენციას ის სრულად ეთანხმება:

"მაგრამ მანამ, სანამ აშშ ბირთვული იარაღით ჩრდილოეთ კორეას აშანტაჟებს და ემუქრება, ჩვენ არ შევუერთდებით შეთანხმებას".

კიმ ინ რენის განმარტებით, ბალისტიკური რაკეტებისა და ბირთვული იარაღის ქონა ფხენიანისთვის "თავდაცვის გამართლებული ხერხია":

"დიდი ხნის განმავლობაში არც ერთ ქვეყანას არ უგრძვნია აშშ-ის მხრიდან ასეთი დიდი და პირდაპირი ბირთვული საფრთხე".

მისივე თქმით, კორეის ნახევარკუნძულზე სიტუაციამ კრიტიკულ ზღვარს მიაღწია და ბირთვული ომი შეიძლება ნებისმიერ დროს დაიწყოს. მანვე განაცხადა, რომ სანამ აშშ-ის მხრიდან საფრთხე არ იკლებს, ისინი მოლაპარაკებებზე წასვლას არ აპირებენ:

"აშშ-ის მთელი ტერიტორია ჩვენი რაკეტების საფრენ ზოლში არის და თუ ისინი ოდნავ შემოჭრასაც გადაწყვეტენ, ჩვენს სასტიკ დასჯას ვერ გადაურჩებიან".

19 სექტემბერს, აშშ-ის პრეზიდენტმა დონალდ ტრამპმა გაეროს გენერალური ასამბლეის სადებიუტო გამოსვლაში ჩრდილოეთ კორეის საკითხზე ისაუბრა. მისი თქმით, საჭიროების შემთხვევაში ამერიკა საკუთარი თავისა და მოკავშირეების დასაცავად ჩრდილოეთ კორეას გაანადგურებს.

რამდენიმე დღის შემდეგ საპასუხო განცხადება გააკეთა ჩრდილოეთ კორეის ლიდერმა, კიმ ჩენ ინიმ. მისი თქმით, აშშ-ის "შეშლილი" პრეზიდენტის განცხადებამ ატომური იარაღის განვითარების აუცილებლობაში დაარწმუნა. კიმის განცხადებით, ის აიძულებს ტრამპს, პასუხი აგოს თავისი სიტყვების გამო.

გაერომ, ბირთვული იარაღის გამოცდის გამო, ჩრდილოეთ კორეის წინააღმდეგ სანქციები დაამტკიცა. 3 სექტემბერს ფხენიანმა წყალბადის ბომბი გამოსცადა. როგორც ადგილობრივი მედია იუწყება, გამოცდამ წარმატებით ჩაიარა. 2006 წლის შემდეგ ეს იყო ჩრდილოეთ კორეის ბირთვული იარაღის რიგით მეექვსე გამოცდა.