ჩრდილოეთ კორეის ლიდერის კიმ ჩენ ინის თქმით, აშშ-ის "შეშლილი" პრეზიდენტის განცხადებებამ ატომური იარაღის განვითარების აუცილებლობაში დაარწმუნა, წერს BBC.

KCNA-მ ჩრდილოეთ კორეის ლიდერი მიმართვის სრული ტექსტი გაავრცელა. მიმართვაში ნათქვამია, რომ კიმ ჩენ ინი აიძულებს ტრამპს, პასუხი აგოს თავისი სიტყვების გამო:

"მინდა ტრამპს ვურჩიო დაკვირვებით შეარჩიოს სიტყვები და რაზე საუბრობს, როდესაც მსოფლიოს წინაშე სიტყვით გამოდის."

კიმის თქმით, აშშ-ის პრეზიდენტის "ფსიქიკურად არაჯანსაღი" საქციელი სუვერენული სახელმწიფოს სრული განადგურების არაეთიკურ ნებას გამოხატავს:

"მმართველობაში მოსვლის შემდეგ ტრამპმა მსოფლიო ყველა სახელმწიფოს მხრიდან მოსალოდნელი საფრთხის შფოთად აქცია. ის სახელმწიფოს უმაღლესი სარდლის პრეროგატივის შესრულებისთვის უვარგისია და ის არის განდევნილი და განგსტერი, რომელსაც უყვარს ცეცხლით და არა პოლიტიკით თამაში."

მისი თქმით, ის ბევრს ფიქრობს იმაზე, თუ რა პასუხს ელოდება ტრამპი თავისი "ექსცენტრული" განცხადების შემდეგ:

"მიუხედავად იმისა, თუ რას ელოდებოდა ტრამპი, საბოლოოდ ის შეხვდება შედეგს, რომელიც მისი ვარაუდების საზღვრებს გასცდება."

19 სექტემბერს, აშშ-ის პრეზიდენტმა დონალდ ტრამპმა გაეროს გენერალური ასამბლეის სადებიუტო გამოსვლაში ჩრდილოეთ კორეის საკითხზე ისაუბრა. მისი თქმით, საჭიროების შემთხვევაში ამერიკა საკუთარი თავისა და მოკავშირეების დასაცავად ჩრდილოეთ კორეას გაანადგურებს.

რამდენიმე დღის წინ გაერომ, ბირთვული იარაღის გამოცდის გამო, ჩრდილოეთ კორეის წინააღმდეგ ახალი სანქციები დაამტკიცა. 3 სექტემბერს ფხენიანმა წყალბადის ბომბი გამოსცადა. როგორც ადგილობრივი მედია იუწყება, გამოცდამ წარმატებით ჩაიარა. 2006 წლის შემდეგ ეს იყო ჩრდილოეთ კორეის ბირთვული იარაღის რიგით მეექვსე გამოცდა.