ოცნების პარლამენტის თავმჯდომარემ, შალვა პაპუაშვილმა ჟურნალისტებთან საუბრისას სუს-ის უფროსის, მამუკა მდინარაძის აშშ-ში ვიზიტთან დაკავშირებით ისაუბრა და აღნიშნა, რომ მამუკა მდინარაძე აშშ-ში ამერიკული მხარის მიწვევით იმყოფებოდა. მისივე თქმით, აშშ-სა და საქართველოს სხვადასხვა სახელმწიფო ინსტიტუტებს შორის ურთიერთობა გრძელდება და მნიშვნელოვანია "აშშ-სა და საქართველოს უსაფრთხოების სამსახურების თანამშრომლობა იმ გამოწვევების ფონზე, რომელიც დღეს გლობალურად არსებობს."

"ჩვენ ვამბობდით, რომ საქმიანი ურთიერთობა სახელმწიფოს სხვადასხვა ინსტიტუტებს შორის გრძელდება. თქვენ ნახეთ სახელმწიფო უსაფრთხოების სამსახურის განცხადებაც. ეს იყო საკითხი, რომელიც უსაფრთხოების ნაწილში თანამშრომლობას ეხება. ჩვენთვის მნიშვნელოვანია აშშ-სა და საქართველოს უსაფრთხოების სამსახურების თანამშრომლობა იმ გამოწვევების ფონზე, რომელიც დღეს გლობალურად არსებობს და იმ პოლიტიკის ფონზე, რომელსაც აშშ ატარებს, რომ შეამციროს კონფლიქტები და უზრუნველყოს მშვიდობიანი განვითარება. ჩვენი საქმიანი და სამსახურებრივი ურთიერთობები მნიშვნელოვანია", — განაცხადა პაპუაშვილმა.

ჟურნალისტის კითხვაზე მდინარაძის აშშ-ში ვიზიტისას ხომ არ განიხილებოდა, ბიძინა ივანიშვილისთვის სანქციების მოხსნის საკითხი, პაპუაშვილმა უპასუხა, რომ სახელმწიფო უსაფრთხოების სამსახურის მიერ გავრცელებულ ინფორმაციაში ვიზიტის მიზანი დაკონკრეტებული იყო და ის ქვეყნების უსაფრთხოების სამსახურებს შორის თანამშრომლობას შეეხებოდა. მისივე თქმით, მამუკა მდინარაძე ამერიკულმა მხარემ მიიწვია.

"სახელმწიფო უსაფრთხოების სამსახურის განცხადებაში მოცემულია, რა იყო ვიზიტის მიზანი, საფუძველი და რა იყო შინაარსი. ვიზიტი შეეხებოდა უსაფრთხოების სამსახურებს შორის თანამშრომლობას, განსაკუთრებით რეგიონის გამოწვევების გათვალისწინებით, რათა უსაფრთხოების თვალსაზრისით ორივე ქვეყნის ინტერესების განხორციელება იყოს უზრუნველყოფილი. როგორც კერძო ურთიერთობებშია, ასევეა სახელმწიფოს შორის ურთიერთობებში, რომ მასპინძელი იწვევს სტუმარს",— განაცხადა პაპუაშვილმა.

შეგახსენებთ, სუს-მა გაავრცელა ინფორმაცია, სადაც აღნიშნულია, რომ "სახელმწიფო უსაფრთხოების სამსახურის უფროსი 7-10 თებერვალს, თავისი კოლეგების მიწვევით, სამუშაო ვიზიტით ამერიკის შეერთებულ შტატებში იმყოფებოდა. შეხვედრა უსაფრთხოების საკითხებთან დაკავშირებით გაიმართა."